ހުމާއި ރޯގާ އަށް ބޭނުންކުރާ ސިޓްރިޒަން ސިރަޕްގައި ކެމިކަލް މާއްދާއެއް ހުރުމުން، އެ ބޭސް ރާއްޖޭގައި ވިއްކުން އެމްއެފްޑީއޭ އިން މަނާކޮށްފި އެވެ.
މިއަދު އެމްއެފްޑީއޭ އިން ނެރުނު އެލަރޓް ގައި ވަނީ ކެއްސުމާއި ހުން އަދި ރޯގާ އަށް އޮކްޓޯބަރު، 2022 އިން ފެށިގެން ބޭނުންކުރާ ދިޔާ ބޭހުގައި ކެމިކަލް މާއްދާއެއް ކަމަށްވާ ޑައިއީތައިލިން ގްލައިކޯލް އަދި އިތައިލީން ގްލައިކޯލް ހިމެނޭ ކަމަށް، ދުނިޔޭގެ ސިއްހަތު ޖަމިއްޔާ އިން އެލާޓް ނެރެފައިވާ ކަމަށެވެ.
އެކަމާ ގުޅިގެން ރާއްޖެ އިން ވެސް ރެންޑަމް ސާމްޕަލް ނަގައި ސްކްރީން ކުރުމުގެ މަސައްކަތް ކުރަމުން އަންނަ ކަމަށާއި އެކަމަކު، އެ ޓެސްޓު ރާއްޖޭގައި ހެދޭނެ ގޮތެއް ނެތުމުން ބޭރަށް ފޮނުވައިގެން ޓެސްޓު ހަދަން ހަމަޖައްސާފައިވާ ކަމަށް އެމްއެފްޑީއޭ އިން ބުންޏެވެ.
މި އަހަރުގެ މިހާތަނަށް 10 ސާމްޕަލް މާކެޓުން ނަގައި ސްކްރީން ކުރިއިރު، ޕާކިސްތާނުގެ ފާމިކްސް ލެބޮރަޓޮރީން އުފެއްދި ސިޓްރިޒެންގެ B220 ބެޗުގައި އެ ކެމިލަކް ހުރިކަން ކަށަވަރުވެފައިވާ ކަމަށް އެމްއެފްޑީއޭ އިން ބުންޏެވެ.
މި ދެ ކެމިކަލަކީ ނެފްރޯޓޮކްސިން އަކަށް ވާތީ ހަށިގަނޑަށް އެތެރެ ވެއްޖެނަމަ މިއީ ހަށިގަނޑުގައިވާ ގުނަވަންތަކުގެ މަސައްކަތް ތަކަށް ބުރޫ އަރާނެ ފަދަ ނުރައްކާތެރި ކެމިކަލް ތަކެކެވެ. އެހެންނަމަވެސް މިއީ ފަސޭހައިން ލިބެން ހުންނަ، އަގު ހެޔޮ ކެމިކަލަކަށް ވާތީ ބައެއް ބޭސް ތަކުގައި މި ދެ ކެމިކަލް ހިމަނާފައި ހުރެއެވެ.
Advertisement
This content is created and paid for by advertisers and does not involve Voice Journalists
