ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ފުލެޓް ދޫކުރުމަށްޓަކައި ހިންގާ ގެދޮރުވެރިޔާ ސްކީމުގެ ދަށުން މާލެ ސަރަޙައްދުން ފުލެޓަށް އެދި ހުށަހަޅާފައިވާ ފަރާތްތަކުގެ ދާއިމީ ލިސްޓު ގެ ގޮތުގައި މިދިޔަ ހޮނިހިރު ދުވަހު ނެރުނު ލިސްޓާއި ގުޅިގެން އެންޓި ކޮރަޕްޝަން ކޮމިޝަނަށް 100 ސިޓީ ހުށައަޅައިފިއެވެ.

ގެދޮރުވެރިޔާ ލިސްޓާއި ގުޅިގެން ހުރި ޝަކުވާ ތަކާއި ކަންބޮޑުވުންތައް ހިމެނޭ މި ސިޓީތައް އޭސީސީއަށް އާއްމުންގެ ފަރާތުން ހުށަހަޅާފައިވަނީ މިއަދުގެ ވަގުތެއްގައެވެ. އެކަމަށްޓަކައި ގިނަ ބަޔަކު ވަނީ އޭސީސީއަށް ގޮއްސައެވެ. 

4000 ފުލެޓް ލިބޭ މީހުންގެ ލިސްޓާއި ގުޅިގެން ނުރުހުން ފާޅުކޮށް މި ހަފްތާގެ އާދީއްތަ ދުވަހު ގިނަ ބަޔަކު ވަނީ ހައުސިންގ މިނިސްޓްރީއަށްވެސް ގޮސް އަޑު އުފުލާފައެވެ. 

އެއާއެކު މިހާރު ވަނީ ޕޯޓަލް މެދުވެރިކޮށް ދާއިމީ ލިސްޓަށް ޝަކުވާ ހުށަހަޅަން ހުޅުވާލާފައެވެ. 

ގެދޮރުވެރިޔާ ސްކީމްގެ ދަށުން 4000 ފުލެޓު ލިބުނު މީހުންގެ ނަންތައް ހޮނިހިރު ދުވަހު އިއުލާނު ކުރިއިރު، އެއިއުލާނުގައި ބުނެފައިވާ ގޮތުން ތިން ކޮޓަރީގެ ފްލެޓްގެ ދާއިމީ ލިސްޓުގައި ހިމެނީ 76 އިން ފެށިގެން މަތިން މާކްސް ލިބިފައިވާ މީހުންނަށް ކަމަށެވެ. އަދި ދެ ކޮޓަރީގެ އެޕާޓްމަންޓްތައް ލިބެނީ 73 އަށް ވުރެ ގިނައިން މާކްސް ލިބުނު މީހުންނަށް ކަމަށެވެ.

އެހެން ނަމަވެސް، ފުލެޓަށް އެދުނު މީހުންނަށް ޕޮއިންޓް ދީފައި ހުރިގޮތް ދެކޮޅު ނުޖެހޭ ކަމަށާއި، ޝަރުތު ހަމަނުވާ މީހުންނަށް ޝަރުތު ހަމަވާ މީހުންނަށް ވުރެ މަތިން މާކްސް ދީ ފްލެޓް ދީފައިވާ ކަަމަށްވެސް އެއްބަޔަކު ބުނެފައިވެއެވެ.