ވ. އާރަށް ކުއްޔަށްދިނުމުގެ މުޢާމަލާތާ ގުޅިގެން ރިޝްވަރު ހިފުމާއި މަނީ ލޯންޑްރިނގްގެ ކުށް ސާބިތުވާ ކަމަށް ކަނޑައަޅައި ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމް 5 މިލިއަން ޑޮލަރުން ޖޫރިމަނާކުރުމަށް ކްރިމިނަލް ކޯޓުން ކުރި ހުކުމާ އެއްގޮތަށް ފައިސާ ނުދައްކާ ކަމަށް ބުނެ ދައުލަތުން ސިވިލް ކޯޓަށް ހުށަހެޅި މައްސަލަ ނުބަލަން ނިންމައިފިއެވެ.
ސިވިލް ކޯޓުން މި ނިންމުން ނިންމާފައިވަނީ އިއްޔެގެ ވަގުތެއްގައެވެ.
ވ. އާރަށް ކުއްޔަށްދިނުމުގެ މުޢާމަލާތާ ގުޅިގެން ރިޝްވަރު ހިފުމާއި މަނީ ލޯންޑްރިނގްގެ ކުށް ސާބިތުވާ ކަމަށް ކަނޑައަޅައި ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމް 11 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރުމަށް ކްރިމިނަލް ކޯޓުން ހުކުމް ކޮށްފައިވަނިކޮށް އެ ޙުކުމް ތަންފީޛްކުރުން ފަސްކުރުމުގެ އަމުރަށް އެދި 07 އޮގަސްޓް 2023 ގައި ޔާމީންގެ ފަރާތްޕުޅުން ވަނީ ދިވެހިރާއްޖޭގެ ހައިކޯޓަށް ހުށަހަޅާފައިވެއެވެ.
އެ މައްސަލާގައި ދިވެހިރާއްޖޭގެ ހައިކޯޓުން ވަނީ ޖޫރިމަނާ އަދަބު ފަސްކުރުމުގެ ވަގުތީ އަމުރެއް ނެރުއްވާފައިވެއެވެ. އަދި އެ އަމުރުގައި، ރައީސް ޔާމީންގެ ފަރާތުން ހުށަހަޅައިގެން ހައިކޯޓުގައި ކުރިއަށްދާ އާރަށު އިސްތިއުނާފް މައްސަލަ ނިމުމުގެ ކުރިން އެ ފައިސާ ހޯދުމަށް ކޯޓަށް އެއްވެސް މައްސަލައެއް ހުށަހަޅާފައި ވާނަމަ އެ މައްސަލައެއް ކުރިއަށް ނުގެންދެވޭނެކަމަށާއި, އެނޫންވެސް ގޮތަކަށް މީރާއިން ނުވަތަ ދައުލަތުގެ އެހެންވެސް މުވައްސަސާ އަކުން އެއްވެސް މަސައްކަތެއް ނުކުރުމަށް ހައިކޯޓުން ވަނީ އަންގާފައެވެ.
އެކަން ކަމަށް ރިޢާޔަތްކޮށް ސިވިލް ކޯޓުން އިއްޔެ ވަނީ ރައީސް ޔާމީންގެ އަތުން 5 މިލިއަން ޑޮލަރު ހޯދަން ދައުލަތުގެ އެޓަރނީ ޖެނަރަލްގެ އޮފީހުން ސިވިލް ކޯޓަށް ހުށަހެޅި މައްސަލަ ނުބެލޭނެ ކަމަށް ނިންމާފައެވެ.
Advertisement
This content is created and paid for by advertisers and does not involve Voice Journalists
