ދިވެހި ރާއްޖޭގެ ރައީސުލް ޖުމްހޫރިއްޔާ ކަމަށް ހުވާ ކުރުމުގެ ކުރިންވެސް ޤައުމުގެ އިޤްތިޞާދީ ދުވެލި ހަލުއިކުރަން އިންތިހާބީ ރައީސް ޑރ. މުހައްމަދު މުޢިއްޒު މަސައްކަތް ކުރައްވާތަން ފެންނިވަޑައިގަންނަވާކަމަށް ވިދާޅުވެ ނައިފަރު ދާއިރާގެ މެމްބަރު އަހްމަދް ޝިޔާމް މުޢިއްޒު އަށް ތައުރީފް ކުރައްވައިފިއެވެ.
ޝިޔާމް މިހެން ވިދާޅުވެ ޓްވީޓް ކުރެއްވީ އެއާޕޯޓު ނިންމަން ބޭނުންވާ 80 މިލިއަން ޑޮލަރު ހަމަޖައްސައިދިނުމަށް ޔޫއޭއީގެ ސަރުކާރުން ނިންމާފައިވާ ކަމަށް އިންތިހާބީ ރައީސްގެ ތަރުޖަމާނު މުހައްމަދު ފިރުޒުލް ވިދާޅުވުމާއި ގުޅިގެންނެވެ.
މިކަމާއި ބެހޭގޮތުން އަހްމަދު ޝިޔާމް ވިދާޅުވީ، ޑރ މުޢިއްޒު މަގާމުގެ ހުވާ ކުރެއްވުމުގެ ކުރިންވެސް ފެންނަނީ ޤައުމުގެ އިޤްތިޞާދީ ދުވެލި މަޑުޖެހިފައި ހުރި ބޮޑެތި ކަންކަމަށް ހައްލު ހޯއްދަވާ، ރައްޔިތުންގެ ފުދުންތެރިކަން އިތުރުކުރެއްވުމަށް މަސައްކަތްޕުޅު ކުރައްވާތަން ކަމަށާއި، ކުރިޔަށް އޮތީ ދިވެހީންނަށް އުޖާލާ ދުވަސްތަކެއް ކަމަށެވެ.
ވީއައިއޭގެ އާ ޕެސެންޖާ ޓާމިނަލްގެ ޑިޒައިނަށް ގެނެވުނު ބަދަލާއެކު މަސައްކަތް ނިންމުމަށް އިތުރު 200 މިލިއަން ޑޮލަރު ބޭނުންވާއިރު ، އޭގެ ތެރެއިން 100 މިލިއަން ޑޮލަރު ފޯރުކޮށްދިނުމަށް ސައުދީ ފަންޑުން ވަނީ އެއްބަސްވެފަ އެވެ.
ބާކީ ބޭނުންވާ 100 މިލިއަން ޑޮލަރުގެ ތެރެއިން 80 މިލިއަން ޑޮލަރު ޔޫއޭއީގެ އަބޫ ދާބީގެ ފަންޑު ފޯ ޑިވޮލެޕްމެންޓު (އޭޑީއެފްޑީ) މެދުވެރިކޮށް ހަމަޖައްސަވާނެ ކަމުގެ ޔަގީންކަން ޔޫއޭއީން ދިނުމާއެކު އެ މަސައްކަތް އަންނަ އަހަރަށް ނިންމޭނެ ކަމުގެ ޔަގީންކަން ލިބިފައިވާ ކަމަށް ފިރުޒުލް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
