ޑެންގޫ މަދިރި ހަފައިގެން ބާއްވަންޖެހޭ ކުޑަކުދިންގެ އަދަދު އިތުވަމުން ދާތީ ސަމާލުވާންވީ ކަންތައްތައް ކުޑަކުދީންގެ ޚާއްސަ ޑޮކްޓަރު އަހްމަދް ފައިސަލް ވިދާޅުވެދެއްވައިފިއެވެ.
މިއަދު ޑރ.ފައިސަލް ކުރެއްވި ޓްވީޓެއްގައި ވިދާޅުވީ ރޭގައި އެކަނިވެސް ޑެންގޫ ޖެހިގެން 3 ކުއްޖަކު އެނދުމަތި ކުރި ކަމަށާއި މީގެ ތެރެއިން ދެ ކުއްޖަކީ ވިލިމާލެ ހޮސްޕިޓަލުން ފޮނުވާފައިވާ ދެކުދިން ކަމަށެވެ.
އެހެންކަމުން، ޑެންގީ ހުން ޖެހުމުން ސަމާލުވާންވީ ގިނަ ކަންކަން ޑރ. ވަނީ ފާހަގަކުރައްވާފައެވެ.
ޑެންގޫ ހުމަކީ މަދިރީގެ ޒަރީއާއިން ޖެހޭ ވައިރަލް ހުމެކެވެ. މި ހުމުގައި އާންމުކޮށް ފެންނަ އަލާމާތް ތަކުގެ ތެރޭގައި ހުން އައުމާއި، ގައިގައި ރިއްސުމާއި ހޮޑުލުން އަދި ގައި ހިރުވައި ތަންތަން ރަތްވެ ބިހި ނެގުން ހިމެނެއެވެ.
އެހެން ކަމުން ޑރ.އިރުޝާދު ދެއްވާފައިވަނީ ބަލި ވުމުން އަރާމުކޮށް، ގިނަ ގިނައިން ދިޔާ ތަކެތި ބޭނުންކުރުމަށެވެ. އަދި ހޮޑު ލެވޭނަމަ ކަރާފަނި ފަދަ ރަތް ކޮށް ހުންނަ، ނޫނީ މައިލޯ ފަދަ ކުލަގަދި ދިޔާތަކެތި ބުއިމުން ދުރުހެލި ވުމަށެވެ. ހަމައެހެންމެ އަދި ޕެރެސިޓަމޯލް ފިޔަވާ އެހެން ބޭހެއް ހުމަށާއި ގައިގައި ރިއްސުމަށް ބޭނުން ނުކުރުމަށް ވެސް އިރުޝާދު ދެއްވައެވެ.
މީގެ އިތުރުންވެސް ޑރ.ފައިސަލް ވަނީ ހުންމަޑުވާއިރުވެސް ބަލިހާލު ބޮޑުވެ ހޭވެރިކަން ނެތުމާއި، ހަށިގަނޑުގެ އެއްވެސް ތަނަކުން ލޭއައިސް ބިހި ނެގުމާއި އަތް ފައި ފިނިވެ ހަ ގަޑިއިރު ވާއިރުވެސް ކުޑަކަމު ނުދެވުން ފަދަ އެއްވެސް އަލާމާތެއް ކުރިމަތި ވާނަމަ އަވަހަށް ޑޮކްޓަރަށް ދެއްކުމަށް އިލްތިމާސް ކުރައްވާފައެވެ.
Advertisement
This content is created and paid for by advertisers and does not involve Voice Journalists
