އޮމްބަޑްސްޕަރސަންގެ އޮފީހަށް އިތުރު 6 މަސް ދިނުމަށް އެދި އެ އޮފީހުގެ މުވައްޒަފުން ރައީސް އޮފީހަށް ޕެޓިޝަނެއް ހުށައަޅައިފިއެވެ.

މި ޕެޓިޝަން ގައި ބުނެފައިވަނީ އޮފީހަށް މައްސަލަ ހުށައެޅުމަށް ހުޅުވާލެވުނީ 13 ޖޫން 2021 ކަަމަށް ވާއިރު، އޮފީހުގެ މުއްދަތު 17 ޑިސެންބަރު 2022 އަށް ހަމަވާއިރު ކޮވިޑް ގެ ހާލަތާއި ގުޅިގެން އޮފީހުގެ މަސައްކަތްތައް ފެށިފައިވަނީ ނޮވެންބަރު 2021 ހިސާބުގައި ކަމަށެވެ. އަދި 2022 ގައި ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު އޮފީހުގެ މުއްދަތު 17 ނޮވެންބަރު 2023 އަށް އިތުރު ކޮށްދެއްވާފައި ވާ ކަމަށާ، ވުމާއެކު އޮފީހުގެ މުއްދަތު ހަމަވުމަށް ރަސްމީ ގޮތުން ހަފްތާއަކަށް ވެފައިވާ ކަމަށެވެ. 

ކަން މިހެން ހުރި އިރު، އެއޮފީހަށް މިހާތަނަށް ހުށައެޅުނު 489 މައްސަލައިގެ ތެރެއިން 170 ވަރަކަށް މައްސަލަ އަދިވެސް ނުނިމި އޮތް ކަމަށް އެ އޮފީހުން ފާހަގަ ކުރިއެވެ. 

Advertisement

އިތުރަށް އެ އޮފީހުން ބުނެފައިވަނީ އެތައް މައްސަލަ އެއް މީޑިއޭޝަންގެ މަރުހަލާގައި ވާއިރު، މީޑިއޭޝަން އަށް އަންނަން ޖެހޭ އެތައް މައްސަލަ ތަކެއް އޮފީހުގެ ބިއުރޯ ޕްރޮސެސްގައި ވާކަމަށެވެ. އެމައްސަލަތަކަކީ މީގެ އެތައް އަހަރެން ކުރިން ހިނގާފައިވާ މައްސަލަތަކަަކަށް ވާތީ އެމއްސަލަ ތަކާއި ގުޅޭ މައުލޫމާތު ތަހުގީގަށް ހޯދުމަށް ބަލާއިރު، އެއީ ގިނަ ދުވަސް ތަކެއްވީ ލިޔުމަކަށް ވާތީ ދައުލަތުގެ މުއައްސަސާ ތަކުން އެ ލިޔުންތަކާއި ގުޅޭ މައުލޫމާތު ހޯދުމަށް ގިން ދުވަސްތަކެއް ނަގާކަން އެއޮފީހުން ފާހަގަ ކޮށްފައިވެއެވެ.

މި އެންމެހާ ކަންކަމަށް ރިއާޔަތް ކޮށް ރައީސް އޮފީހަށް އޮމްބަޑްސްޕަރސަންގެ އޮފީހުން ހުށައެޅި ޕެޓިޝަން އެދިފައި ވަނީ އެ އޮފީހުގައި މަސައްކަތް ކުރާ 36 މުވައްޒަފުންނަކީ ވަޒީފާ އާއި ގުޅިގެން ދައުލަތުގެ ތެރެއިން ގޮތް ތަކެއް ނިންމިގެންދާނެ ކަމުގެ އުންމީދެއް ދެވިގެން އެކަމުގެ ބަރޯސާގައި ތިބި މުވައްޒަފުން ކަމަށް ވެފައި، ކޮންމެ މުވައްޒަފަކީވެސް އާއިލާއެއް ބެލުމުގެ ޒިންމާ ނަގާ ބަޔަކަށް ވާތީ މުވައްޒަފުންނާއި ގުޅޭ ކަންކަމުގައި ފަހި ގޮތް ތަކެއް ހޯދުމަށްޓަކައި އެ އޮފީހަށް އަދި 6 މަސް ދުވަސް އިތުރު ކޮށްދިނުމެވެ.

އިންތިޤާލީ އިންސާފުގެ ގާނޫނަށް އަމަލު ކުރަން ފަށާފައިވަނީ 17 ޑިސެންބަރު 2021 ގައެވެ.