ރިސޯޓްތައް ތަރައްޤީއަށް ބަންދު ކުރެވޭ މުއްދަތު އިތުރުކޮށްފިއެވެ.

ފަތުރުވެރިކަމުގެ ބޭނުންތަކަށް ކުއްޔަށް ދޫކޮށްފައިވާ ތަންތަން ތަރައްޤީ ކުރުމަށް ދެއަހަރަށް ބަންދުކުރެވޭ ގޮތައް މިހާރު ވަނީ ބަދަލުކޮށްފައެވެ.

ކުރިން ރިސޯޓެއް އަލުން ތަރައްޤީ ކުރުމަށް ބަންދުކުރަން ހުއްދަ ދެނީ 18 މަސް ދުވަހަށެވެ. ނަމަވެސް ޓޫރިޒަމް މިނިސްޓްރީގެ އެކަމާއި ގުޅޭ އެޤަވާއިދަށް ގެނައި އިސްލާހުގައި ބުނީ ރީޑިވެލޮޕްމަންޓަށް ތަނެއް ބަންދު ކުރެވޭނީ ގިނަވެގެން ދެ އަހަރު ދުވަހަށް ކަމަށެވެ.

Advertisement

ހަމަ އެހެންމެ މި ޤަވާއިދަށް އަމަލުކުރަން ފަށާއިރު، ރީޑިވެލޮޕްމަންޓަށް ބަންދުކޮށްފައިވާ ތަންތަން، ދީފައިވާ މުއްދަތު ހަމަވުމުގެ ކުރިން އެކަމަށް އެދި މިނިސްޓްރީއަށް ހުށަހަޅައިފިނަމަ، އިތުރު އެއް އަހަރު ދުވަހުގެ މުއްދަތެއް އެތަންތަން ރީޑިވެލޮޕްމަންޓް ކުރަން ދެވިދާނެ ކަމަށް ވެސް އެ އިސްލާހުގައި ބުނެފައި ވެއެވެ.

އަދި ދީފައިވާ މުއްދަތުގައި މަސައްކަތް ނުނިމޭ ހާލަތުގައި، ގަވާއިދުގައިވާ ގޮތަށް މަސައްކަތް ނިންމުމަށް އިތުރު ޕީރިއަޑް އިތުރުކޮށް ދިނުމުގެ އިޚްތިޔާރު ވެސް މިނިސްޓްރީއަށް ލިބިގެންވާ ކަމަށް ގަވާއިދުގައި ބުނެފައިވެއެވެ.

މި އިސްލާޙުގައި ބުނެފައިވާ ގޮތުން މުއްދަތު އިތުރު ކުރުމުގެ ކުރިން، ތަން ބަލާ ފާސްކޮށް، މަސައްކަތް ކުރުމަށް ބޭނުންވާ ތަކެއްޗާއި މަސައްކަތްތެރިން ތަނުގައި ތިބިކަން ޓޫރިޒަމް މިނިސްޓްރީން ކަށަވަރުކުރަން ޖެހޭނެ ކަމަށާއި މަސައްކަތް ނިމިފައިވާ ގޮތް ބަޔާންކޮށްދޭ ރިޕޯޓެއް ކަމާބެހޭ އިދާރާއެއްގެ ހުއްދަ ލިބިފައިވާ އިންޖިނިއަރެއްގެ ސެޓިފިކެޓަކާއެކު ހުށަހެޅަންޖެހޭނެ އެވެ.

ހަމަމިއާއި އެކު ކޯޓު ހުކުމަކާ ނުވަތަ ކޯޓު އަމުރަކާ ގުޅިގެން، ތަނަކާ ގުޅުން ހުރި ހައްޤުތައް އެހެން ފަރާތަކަށް ބަދަލުވާ ހާލަތުގައި، އެ ތަނެއްގެ ކޮންސްޓްރަކްޝަން މުއްދަތު އިތުރުކޮށްދޭނެ އެންމެ ދިގު މުއްދަތު ގުނަން ފަށާ ތާރީޚަކީ އެ ތަނަކާ ގުޅުން ހުރި ހައްޤުތައް ބަދަލުކޮށްފައިވާ ތާރީޚު ކަމަށް އެއިސްލާޙުގައި ބުނެފައިވެއެވެ.