އިރުވައި މޫސުމުގައި ރާއްޖޭގެ އެކި ސަރަހައްދުތަކަށް ހިޖުރަކުރާ ދޫނި ހިފައި އެތަކެތި ގެންގުޅުމަކީ މަނާ ކަމެއް ކަމަށާއި އެކަން ނުކުރުމަށްް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން އިލްތިމާސްކޮށްފިއެވެ.
އީޕީއޭއިން ނެރެފައިވާ ސާކިއުލާ އެއްގައި ބުނީ، އިރުވައި މޫސުމަކީ އެހެނިހެން އަހަރުތަކެކޭ އެއްފަދައިން ދުނިޔޭގެ އެކި ކަންކޮޅުތަކުން ވަރަށް ގިނަ ބާވަތްތަކުގެ ދޫނި ރާއްޖެއަށް ހިޖުރަކުރަމުން އަންނަ ދުވަސްވަރެއް ކަމަށެވެ.
އަދި މިފަދައިން މޫސުންތަކާއި ދިމާކޮށް ހިޖުރަކުރާ ދޫނިތަކަކީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ ގަވައިދުގެ ދަށުން ހިމާޔަތްކުރެވިފައިވާ ދިރުންތަކެއް ކަމަށް އިޕީއޭއިން ބުނެފައިވެއެވެ.
އެގޮތުން، އީޕީއޭއިން ބުނީ ރާއްޖެއަށް ހިޖުރަކުރާ ދޫނި ހިފާ ގެންގުޅުމަކީ މި ގަވައިދުގެ ދަށުން މަނާ ކުރެވިފައިވާ ކަމެއް ކަމަށެވެ.
ދިވެހިރާއްޖޭގައި ފެންނަ ގިނަ ބާވަތްތަކުގެ ދޫންޏަކީ މިގޮތަށް މޫސުމާއި ގުޅިގެން ރާއްޖެއަށް ހިޖުރަކުރާ ބާވަތްތަކުގެ ދޫނިކަމަށާއި މިތަކެތި ރައްކާތެރިކުރުމަކީ ދިވެހިރާއްޖޭގެ ދިރުންތަކުގެ ސިންދަފާރު ނުވަތަ ގުދުރަތީ ވެށީގެ މުއްސަނދިކަން ރައްކާތެރިކުރުމަށް އެޅިގެންދާ މުހިއްމު ފިޔަވަޅެއް ކަމަށް އީޕީއޭ އިން ނެރެފައިވާ ބަޔާނުގައި ފާހަގަ ކޮށްފައިވެއެވެ.
އީޕީއޭއިން ވަނީ މިފަދަ ދޫނިތައް ނުހިފުމަށާއި އަދި އޭގެ ވިޔަފާރި ނުކުރުމަށް ވެސް ގޮވާލާފައެވެ. އަދި އީޕީއޭގެ އެންގެންތަކާއި ގާނޫނާއި ގަވައިދުތައް ތަންފީޒުކުރުމަށް ހުރިހާ ފަރާތްތަކުން އެއްބާރުލުން ދިނުމަށްވެސް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން އެދިފައިވެއެވެ.
Advertisement
This content is created and paid for by advertisers and does not involve Voice Journalists
