ރާއްޖޭގައި ގާއިމުވެ ތިބި ކަމަށް ބުނާ އިންޑިއާ ސިފައިންގެ އަދަދު ހާމަ ނުކުރުމަށް އިންފޮމޭޝަން ކޮމިޝަނަރުގެ އޮފީހުން ނިންމާފައިވަނީ ރަނގަޅަށް ނޫން ކަމަށް ހައި ކޯޓުން ހުކުމްކޮށްފި އެވެ.

އިންޑިއާ އަސްކަރިއްޔާއިން ހަދިޔާކޮށްފައިވާ އުޅަނދުތައް އޮޕަރޭޓް ކުރުމުގައި ހަރަކާތްތެރިވާ އިންޑިއާ ސިފައިން ހިމެނޭހެން ރާއްޖޭގައި ހަރަކާތްތެރިވާ ސިފައިންގެ ޖުމުލަ އަދަދާއި އެ ސިފައިންނަށް ދިވެހި ދައުލަތުން ކުރާ ހަރަދުގެ ތަފްސީލް ހޯދުމަށް އެދި "ދިޔަރެސް" ނޫހުގެ ނޫސްވެރިޔާ އަހުމަދު އަޒާން، އެންމެ ފުރަތަަމަ ހުށަހެޅީ ޑިފެންސް މިނިސްޓްރީއަށެވެ. 

އެހެންނަމަވެސް އެ މައުލޫމާތު ހާމަކުރުމަކީ ގައުމީ ސަލާމަތަށް ނުރައްކާވާނެ ކަމެއް ކަމަށް ބުނެ އެ މިނިސްޓްރީން މައުލޫމާތު ހާމަ ނުކުރުމުން އަޒާން ވަނީ މައްސަލަ އިންފޮމޭޝަން ކޮމިޝަނަރުގެ އޮފީހަށް ހުށަހަޅާފައެވެ. އެ އޮފީހަށް މައްސަލަ ހުށަހެޅުމުން އެ މައުލޫމާތަކީ ހާމަކުރަންޖެހޭ މައުލޫމާތެއް ނޫންކަމަށް ނިންމުމާ ގުޅިގެން މައްސަލަ ހައިކޯޓަށް ހުށަހެޅީވެސް އަޒާނެވެ. 

މިއަދު ހައިކޯޓުގައި އޮތް އަޑުއެހުމުގައި އެ މައްސަލަ ބެއްލެވި ފަނޑިޔާރުންގެ މަޖިލީހުގެ ރިޔާސަތު ބެލެހެއްޓެވި ފަނޑިޔާރު ހުސައިން ޝަހީދު އިއްވެވި ހުކުމުގައި އޭނާ ފާހަގަކުރެއްވި ގޮތުގައި އެ މައްސަލާގައި އެ މައުލޫމާތަކީ ޤައުމީ ސަލާމަތަށް ނުރައްކާވެދާނެ މައުލޫމާތެއް ކަމުގައި ބަލައި ހާމަކުރަންނުޖެހޭނެކަމަށް އިންފޮމޭޝަން ކޮމިޝަނަރު ނިންމަވާފައިވަނީ، ޤާނޫނުގައި ބަޔާންކުރާ އިޖުރާއާތުތަކާ އުސޫލުތަކާ ޚިލާފަށެވެ.

އަދި ގައުމީ ސަލާމަތަށް ނުރައްކާވާ މައުލޫމާތެއް ކަން ކަނޑައެޅުމުގެ ކުރިން ގާނޫނުގައި ބަޔާންކުރާ އިޖުރާއަތްތަކެއް ހިމެނޭ ކަމާއި، އެ އިޖުރާއަތްތައް ކުރިއަށް ގެންދަން އިންފޮމޭޝަން ކޮމިޝަނަރުގެ އޮފީހަށް ގާނޫން ލިބިދޭ ބާރުތަކެއް ވެސް ހިމެނޭ ކަމަށާ، އެއިން އެއްވެސް ބާރެއް ބޭނުން ނުކޮށް، ހަމައެކަނި ޑިފެންސް މިނިސްޓްރީ އާއި އެމްއެންޑީއެފްއާއެކު އިންފޮމޭޝަން ކޮމިޝަނަރުގެ އޮފީހުން ބޭއްވި ސިއްރު ބައްދަލުވުމެއްގައި ދިން މައުލޫމާތަކަށް، ގައުމީ ސަލާމަތަށް ނުރައްކާވާ ކަމަށް ކަނޑަނޭޅޭނެ ކަމަށް ހައި ކޯޓުގެ ހުކުމުގައިވެ އެވެ.

މީގެ އިތުރުން ޤައުމީ ސަލާމަތަށް ނުރައްކާވެދާނެކަމަށް ބުނެ މައުލޫމާތެއް ހިފަހައްޓާނަމަ އެ މައުލޫމާތެއް ހާމަކުރުމުން ގެއްލުމެއް ލިބުމުގެ އިހުތިމާލު އޮތްކަން އެކަށީގެންވާ ހެކީގެ މައްޗަށް ބިނާކޮށް ހަމަބުއްދިން ޤަބޫލުކުރެވޭ މިންވަރަށް އެކަން ސާބިތުކޮށްދިނުމަކީ ކުރަންޖެހޭނެ ކަމެއް ކަމުގައި ފަނޑިޔާރު ޝަހީދު ވިދާޅުވިއެވެ.

އެހެންނަމަވެސް، އިންފޮމޭޝަން ކޮމިޝަނަރުގެ އޮފީހުން ނިންމި ނިންމުމަށް ވާސިލުވި ސަބަބުތައް އެކަށީގެންވާ ވަރަށް ތަފްސީލުކޮށް، މައުލޫމާތަށް އެދިފައިވާ ފަރާތަށް ހިއްސާކޮށްދީފައިނުވާ ކަމަށް ހައިކޯޓުގަ ހުކުމުގައި އެވެ.

އެހެންކަމުން މި މައްސަލައަކީ އިންފޮމޭޝަން ކޮމިޝަނަރުގެ އޮފީހުން އަލުން ގޮތެއް ނިންމަން ޖެހޭ މައްސަލައެއް ކަމަށް ކަނޑައަޅައި، މިއަދުން ފެށިގެން 10 ދުވަހުގެ ތެރޭގައި، އެ ކޮމިޝަނަށް ހުށަހަޅައިފިނަމަ އެ މައްސަލަ އިޖުރާއަތްތައް ފުރިހަމަކޮށްގެން ބެލުމަށް ހައިކޯޓުން ވަނީ އަމުރު ކޮށްފައެވެ.