ރ.އަތޮޅު ކައުންސިލްގެ ފަރާތުން އިންތިޒާމްކޮށްގެން ބޭއްވި ފުރަތަމަ އަންހެން ހޭންޑްބޯލް މުބާރަތުގެ ފައިނަލުގައި މިއަދު ހަވީރު 11-7 ގެ ނަތީޖާއަކުން ހުޅުދުއްފާރު ބަލިކޮށް އަނގޮޅިތީމުން މުބާރާތުގެ ޗެމްޕިއަންކަން ހޯދައިފި އެވެ.

2023 ނޮވެންބަރ 04 ން 09 އަށް ރ.އުނގޫފާރުގައި ކުރިއަށް ގެންދިޔަ މި މުބާރާތުގައި މިއަހަރު ހަތަރު ޓީމަކުން ބައިވެރިވިއިރު، މުބާރާތުގެ ޗެންޕިއަން ޓީމަށް 30،000 ރުފިޔާ އަދި ރަނަރަޕް ޓީމަށް 20،000 ރުފިޔާގެ ފައިސާގެ އިނާމެއް ހުށަހަޅާފައިވެއެވެ. އަދި މި މުބާރާތް ކުރިއަށް ގެންގޮސްފައި ވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ގިނަ ޕޮއިންޓް ހޯދާ ދެޓީމަށް ފައިނަލުން ފުރުސަތު ލިބޭގޮތަށެވެ. 

އެގޮތުން ހުޅުދުއްފާރުން މުބާރާތުގެ ފައިނަލުން ޖާގަ ހޯދީ ލީގު ބުރުގައި ކުޅުނު ތިން މެޗުގެތެރެއިން ދެ މެޗުން މޮޅުވެ، އެއްމެޗުން ބަލިވެ ލިގު ބުރުގެ ދެވަނަ ޓީމުގެގޮތުގައެވެ. އަދި އަނގޮޅިތީމު ފައިނަލުން ޖަގަ ހޯދީ ލީގު ބުރުގައި ކުޅުނު ތިން މެޗުން ވެސް މޮޅުވެ ލީގު ބުރުގެ އެއްވަނަ ޓީމުގެ ގޮތުގައެވެ.

އުނގޫފާރު ފުޓްސަލް ދަނޑުގައި މިއަދު ހަވީރު ކުޅެވުނު ފޯރިގަދަ ފައިނަލް މެޗުގައި ފުރަތަމަ ލަނޑުޖަހައި ކުރި ހޯދީ އަނގޮޅިތީމުންނެވެ. އަދި މިހާފުގައި ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 4-3 ގެ ނަތީޖާއަކުން އަނގޮޅިތީމު ކުރީގައި އޮވެގެންނެވެ.

މެޗުގެ ދެވަނަ ހާފު ހުޅުދުއްފާރުން ވަރުގަދަކޮށް ފެށިއިރު މިހާފުގެ ވަރަށް ކުރީކޮޅު އެޓީމުން ވަނީ ލަނޑެއް ކަމިޔާބުކޮށް މެޗުގެ ނަތީޖާ އެއްވަރުކޮށްފައެވެ. ނަމަވެސް މުޅި މުބާރާތުގައި ވެސް ތަފާތު މޮޅު ކުޅުމެއްދެއްކި އަނގޮޅިތީމުން މިހާފުގައި އިތުރު 7 ލަނޑު ކާމިޔާބުކުރިއިރު ހުޅުދުއްފަރަށް ކާމިޔާބުކުރެވުނީ އިތުރު ތިން ލަނޑެވެ. މިއާއެކު މެޗުގެ ކުޅުން ނިމިގެންދިޔައީ 7-11 ގެ ނަތީޖާއަކުން އަނގޮޅިތީމު ކުރީގައި އޮވެގެންނެވެ. އަދި ފައިނަލް މެޗުގެ މޮޅު ކުޅުންތެރިއަކަށް ހޮވުނީ އަނގޮޅިތީމު ޓީމުގެ ފާތުމަތު ރިޝްމާއެވެ.

މުބާރާތުގެ އެންމެ މޮޅު 6 ކުޅުންތެރިންނަކީ އައިޝަތު މަޖީދާ (ހުޅުދުއްފާރު)، ފާތުމަތު ރިޝްމާ (އަނގޮޅިތީމު)، އާއިޝަތު ސައުޝަން (އަނގޮޅިތީމު)، އައިޝަތު ނަސްމާ (ހުޅުދުއްފާރު)، ނަޒީމާ އަބްދުއްރަހުމާން (ހުޅުދުއްފާރު) އަދި އާމިނަތު މިންނާ (އިނގުރައިދޫ) އެވެ. މުބާރާތުގެ ފެއާޕްލޭ ކުޅުންތެރިއަކަށް ހޮވުނީ ހުޅުދުއްފާރު ޓީމުގެ އައިޝަތު މަޖީދާ އެވެ.

މުބާރާތުގެ އެންމެ އުންމީދީ ކުޅުންތެރިއަކަށް ހުޅުދުއްފާރު ޓީމުގެ އައިޝަތު ނަސްމާ ހޮވުނުއިރު، އެންމެ މޮޅު ގޯލްކީއްޕަރުގެ މަގާމް ލިބުނީ ހުޅުދުއްފާރު ޓީމުގެ ނަޒީމާ އަބްދުއްރަހުމާން އަށެވެ. މީގެ އިތުރުން މުބާރާތުގެ އެންމެ މޮޅު ކޯޗަކަށް އަނގޮޅިތީމުގެ ކޯޗު ލިއޮނައު ޖަނަމްބާ ހޮވުނުއިރު މުބާރާތުގެ ފެއާޕްލޭ ޓީމަކަށް ހޮވުނީ އިނގުރައިދޫ އެވެ.

މުބާރާތުގެ އެންމެ ޝަރަފުވެރި މަގާމު "ކްއީން އޮފް ދަ ޓޯނަމަންޓް" ގެ އިތުރުން މުބާރާތުގެ އެންމެ ގިނަ ލަނޑުޖެހި ކުޅުންތެރިޔާގެ މަގާމު ވެސްް ލިބުނީ އަނގޮޅިތީމުގެ ފާރުމަތު ރިޝްމާ އަށެވެ. އޭނާ ވަނީ މިމުބާރާތުގައި ޖުމްލަ 28 ލަނޑު ކާމިޔާބުކޮށްފައެވެ.