ކްރެޑިޓް ރިޕޯޓަށް އީފާސް ޑިޖިޓަލް އައިޑީ މެދުވެރިކޮށް ހުށަހެޅޭނެ ގޮތަށް  މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހަމަޖައްސައިފިއެވެ.

މޯލްޑިވްސް މަނިޓަރީ އޮތޯރިޓީން މިއަދު ނެރުނު ނޫސް ބަޔާނެއްގައި ބުނެފައި ވަނީ މޯލްޑިވްސް މަނިޓަރީ އޮތޯރިޓީއިން އަމިއްލަ ފަރުދުންނަށާއި ކުންފުނިތަކަށް ދޫކުރާ ކްރެޑިޓް އިންފޮމޭޝަން ރިޕޯޓް ހޯއްދެވުމަށް ހުށަހަޅުއްވާގޮތަށް މިއަދުން ފެށިގެން ވަނީ ބަދަލުތަކެއް ގެނެވިފައިވާ ކަމަށެވެ. 

އެގޮތުން ކްރެޑިޓް ރިޕޯޓަށް އެދިލައްވާ ފަރާތްތަކުގެ ރިކުއެސްޓްތައް ދެން ބަލައިގަންނާނީ ކްރެޑިޓް ބިއުރޯގެ ވެބްސައިޓް (www.cib.gov.mv) އިން އީފާސް މެދުވެރިކޮށް އަދި އީފާސް ވެރިފައިޑް އެކައުންޓުތަކުން ކަމަށް ވެސް އެނޫސް ބަޔާނުގައި ވެ އެވެ. 

އެމްއެމްއޭ އިން ބުނީ މިގޮތަށް ހަމަޖެހުމާއި ގުޅިގެން ރިޕޯޓަށް އެދި ހުށަހަޅުއްވާ ފަރާތުގެ އޮންލައިން ވީޑިއޯ ވެރިފިކޭޝަން ހެދުން 10 ނޮވެންބަރު 2023 އިން ފެށިގެން ހުއްޓާލާނެކަމަށާއި އަދި ރިޕޯޓް ދޫކުރެވޭނީ މަސައްކަތު 3 ދުވަހުގެ ތެރޭގައި ކަމަށެވެ.

ކަސްޓަމަރުންގެ ރައްކާތެރި ކަމަށްޓަކައި އީފާސްގެ ލޮގިން މަޢުލޫމާތު އެއްވެސް ފަރާތަކާއި ޙިއްސާ ނުކުރެއްވުމަށް އެ އިދާރާއިން އިލްތިމާސް ކޮށްފައި ގެއެވެ.