މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ ރައީސްކަމުގެ މަގާމަށް ދެވަނަ ދައުރަކަށް މުހައްމަދު ސޮބާހް (ޗޭ) އިންތިހާބުކޮށްފިއެވެ.

އެ އިންތިހާބުގައި އެމްއެސްއޭގެ ނައިބު ރައީސްކަމުގެ މަގާމަށް އިންތިހާބުކޮށްފައިވަނީ މީގެ ކުރިން ވެސް އެ މަގާމުގައި ހުންނެވި ޝާހިދު އަމީނެވެ. ޖެނެރަލް ސެކްރެޓަރީއަކަށް އަލީ އަހުސަން އިންތިބާހުކޮށްފައިވާ އިރު، މެންބަރުންގެ ގޮތުގައި އިންތިހާބުކޮށްފައިވަނީ ހުސައިން ސޮލާހާއި ޝާޒިއާ ސައީދެވެ.

ސޮބާހުގެ ރައީސްކަމުގައި މިދިޔަ ފަސް އަހަރުގެ ދައުރުގައި ވެސް ސާފިންއަށް ގިނަ ކުރިއެރުންތައް ހޯދުމަށް ގިނަ މަސައްކަތްތަކެއް ކޮށްފައިވާކަން ފާހަގަ ކޮށްލަން ޖެހެއެވެ. އެގޮތުން ރާއްޖޭގައި ފުރަތަމަ ފަހަރަށް އޭޝިއަން ސާފިން ޗެމްޕިއަންޝިޕް ބޭއްވުމާއި، ރާއްޖޭގައި ސާފިން ލީގެއް ފެށުނީ ވެސް ސޮބާހް ރައީސް ކަމުގައެވެ.

Advertisement

ރައީސްކަމުގެ މަގާމަށް ސޮބާހު އިންތިހާބުކޮށްފައިވަނީ މިދިޔަ ހޮނިހިރު ދުވަހު ބޭއްވި ސާފިން އެސޯސިއޭޝަންގެ ހިންގާ ކޮމިޓީގެ އިންތިހާބުގައެވެ. 

ސާފިންއަކީ ރާއްޖޭގައި އެންމެ ބާރަށް ކުރިއަރަމުން އަންނަ އެއް ކުޅިވަރެވެ. އެގޮތުން ބައިނަލްއަގުވާމީ މުބާރާތްތަކުގައި ވާދަކޮށް ވެސް ރާއްޖޭގެ ސާފިން އެތުލީޓުން ދަނީ ގިނަ ކުރިއެރުންތަކެއް ހޯދަމުންނެވެ.