ކުފުރާއި ފާސިގުކަމުން ފުރިފައިވާ ހިތުގެ ވެރިޔާއަށް ލިބޭނީ اللهގެ ކޯފާއާއި މީސްތަކުންގެ ރުޅިވެރިކަން ކަމަށް ޚުތުބާގައި ބުނެފިއެވެ. 

"ސަލާމަތްވެގެންވާ ހިތް" މި މައުލޫއަށް މިއަދު އިއްވި ޚުތުބާގައި ބުނީ، މާތް الله އިންސާނާ ހައްދަވާފައިވަނީ، މާއްދި ހަށިގަނޑަކާއި ރޫޙާނީ ފުރާނައަކާއި އެކު ކަމަށެވެ. އަދި އިންސާނާއަށް މި ޙަޔާތުގައި އޭނާގެ ދައުރު ފުރިހަމައަށް އަދާކުރެވޭނީ، ރޫޙާނިއްޔަތަށް އިސްކަންދީ އެބައި ފުރިހަމަ ކޮށްގެން ކަމަށް ޚުތުބާގައި ފާހަގަކޮށްފައިވެއެވެ.

"އެކަމުގެ ލަގަނަކީ ހިތެވެ. އިންސާނާއަށް ގިޔާމަތް ދުވަހުން ސަލާމަތްކަމާއި، އަމާންކަން ލިބޭނީ، މި ހިތް ރަނގަޅު ކުރެވުނު މިންވަރަކުންނެވެ." ޚުތުބާގައި ބުނެފައިވެއެވެ. 

ޚުތުބާގައި އިތުރަށް ބުނީ، މާތް اللهގެ ފޮތަށް ބަލާއިރު ހިތްތަކުގެ ހާލަތްތަކެއް ބަޔާންކުރައްވާފައި ވާކަމަށެވެ. އެއް ހިތަކީ ސަލާމަތުންވާ ހިތެވެ. އެ ހިތުގައި ކުފުރުގެ އެއްވެސް ކިލަނބުކަމެއް ނެތި، ނިފާޤުގެ އެއްވެސް އަސަރެއް ނެތް، ޝަޚްވަތުތަކާއި، ފުރެދުންތަކުން އެއްކިބާ ވެފައިވާ ހިތެވެ.

ހިތްތަކުގެ އަނެއް ހާލަކީ މާތް الله އަށް ކާފިރުވެ، މާތް الله ގެ ބަސްފުޅުތަކަށް އުރެދުމުގެ މަތީގައި މަރުވި ހިތެވެ. ތިންވަނަ ހާލަތަކީ ބަލިމަޑުކަމުގައި ވާ ހިތެވެ.

ހުކުރު ޚުތުބާގައި ބުނެފައިވާ ގޮތުން އިންސާނާގެ ހެޔޮކަމުގެ ނާރެހަކީ އޭނާގެ ހިތް ކަމަށާ މާތް الله ބައްލަވާވޮޑިގެންވާ ތަނަކީ ހިތެވެ. އަދި އިންސާނާއަށް ޖަޒާ ލިބުން އޮތީ ހިތުގެ ރަނގަޅުކަމާއި ނުބައިކަމުގެ މައްޗަށް ކަމަށާ، އިންސާނާއަށް ގިޔާމަތްދުވަހުން ސަލާމަތްކަމާއި، އަމާންކަން ލިބޭނީ ހިތް ރަނގަޅު ކުރެވުނު މިންވަރަކުން ކަން ފާހަގަކޮށް ޚުތުބާގައި ބުނީ އީމާންކަމުން ފުރިގެންވާ ހިތަކަށް މެނުވީ ދުނިޔޭގައި ރަނގަޅު ހަޔާތެއް ނުލިބޭނެ ކަމަށެވެ. 

މިއާއެކު ހިތް އިސްލާހުކުރަންވާނީ އޭނާގެ ދުނިޔެއާއި އާޚިރަތް ރަނގަޅުކޮށްދޭނެ މަންހަޖާ އެއްގޮތަށް ކަމަށްވެސް ޚުތުބާގައި ބުންޏެވެ.

ހުތުބާގައި ބުނި ގޮތުގައި ހިތް ގައުވިޔަ ނުދިނުމަށްޓަކައި ހިތަށް ދޭންޖެހޭ އެންމެ ފުރިހަމަ ފަރުވާއަކީ މާތް الله ހަނދުމަކުރުންމަތީ ދެމިހުރުމެވެ. އަދި މާތް الله އަށް ތަކްބީރު، ތަހްމީދު، އަދި ތަސްބީހަ ކިޔުންފަދަ އަމަލުތައް ގިނަ ކުރުމެވެ.

"އީމާންކަމުން ބަބުޅާ ހިތްތަކަކީ މި ބިންމަތީގައި ނަސީބުވެރީންނެވެ. އެއީ އާހިރަތުގެ ބާއްޖަވެރީންނެވެ. އެމީހުންނަކީ އިސްލާމްދީން ތަމްސީލުކުރާ ހެޔޮ ނަމޫނާތަކެވެ،" ހުތުބާގައި ބުނެފައިވެ އެވެ.

އެހެންކަމުން ކޮންމެ އިންސާނަކު ވެސް އޭނާގެ ހިތް ރަނގަޅުކޮށް، އިސްލާހު ކުރުމަށާއި، ހެޔޮ އަމަލުކުރުންމަތީ ދެމިހުރުމަށް މަސައްކަތް ކުރުމަށް ހުތުބާގައި ވަނީ ނަސޭހަތްތެރިވެފަ އެވެ.