ޖުމްހޫރީ ދުވަހުގެ މުނާސަބަތުގައި އިންތިޚާބީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފޮނުއްވި މެސެޖެއްގައި، ދިވެހި ޤައުމު ކުރިއެރުވުމަށް އެންމެން އެކަތިގަނޑެއްގެ ގޮތުގައި މަސައްކަތްކުރަންޖެހޭކަމަށް އިލްތިމާސްކުރައްވައިފިއެވެ.

ދިވެހި ރައްޔިތުންނާއި މުޚާތަބު ކޮށް ފޮނުއްވި މި މެސެޖުގައި އެމަނިކުފާނުވަނީ ޖުމްހޫރީ ދުވަހުގެ ހެޔޮއެދުންތަކާއި މުބާރަކުބާދީ ރާއްޖޭގެ ހުރިހާ ރައްޔިތުންނަށް ފޮނުއްވާފައެވެ.

ޖުމްހޫރީ ވެރިކަމުގެ ފޮނި މީރުކަން ރައްޔިތުންނަށް ލިބިގެންދާނީ ރައްޔިތުންނާއި ސަރުކާރާ ގުޅިގެން ގައުމު އިސްކޮށްގެން މަސައްކަތްތަކެއް ކުރެވިގެން ކަމަށްވެސް އިންތިހާބީ ރައީސް ޑރ. މުހައްމަދު މުއިއްޒުގެ މެސެޖްގައި ވެއެވެ.

Advertisement

މީގެ އިތުރުންވެސް މުއިއްޒު ވަނީ، ޖުމްހޫރީ ވެރިކަން މި ހިސާބަށް ގެނައުމުގައި މަސައްކަތް ކުރި ރައީސުންނަށާއި ހުރިހާ ކެބިނެޓްތަކުގައި މަސައްކަތްކުރެއްވި ބޭފުޅުންނަށާއި ވިޔަފާރިވެރިންނަށާއި ސިޔާސީ ޕާޓީތަކުގެ ވެރިންނަށާއި ގައުމު މި ހިސާބަށް ގެނައުމުގައި މަސައްކަތް ކުރި ހުރި ބޭފުޅުންނަށް ވެސް ދުވަހުގެ ތަހުނިޔާއާއި ޝުކުރު ދަންނަވާފައެވެ.

ދިވެހިރާއްޖެއަށް ހަމަޖެހުމާއި އަމާންކަން ބޭނުންވާކަން ފާހަގަކުރައްވައި ޑރ.މުޢިއްޒު ވިދާޅުވީ ޤައުމުގެ ކުރިމަގަށްޓަކައި އެންމެން އެކަތިގަނޑަކަށްވާންޖެހޭ ކަމަށެވެ. އަދި އެގޮތުން ހުރިހާ އެންމެންވެސް ކުރިއަށްދިއުމަށް އިލްތިމާސްކުރައްވާކަމަށްވެސް އެމަނިކުފާނު ވިދާޅުވިއެވެ.