މި ސަރުކާރުގެ ބޯހިޔާވަހި ކަމުގެ ސިޔާސަތުގެ ދަށުން މާލޭ ސަރަހައްދުގައި އިމާރާތްކުރަމުން އަންނަ 4،000 ފްލެޓަށް، ގެދޮރުވެރިޔާ މަޝްރޫއުގެ ދަށުން ފްލެޓު ލިބޭ މީހުންގެ ދާއިމީ ލިސްޓަށް ޝަކުވާ ހުށަހަޅަން ދިން މުއްދަތުގައި،  އެ ލިސްޓަށް 7،421 ޝަކުވާ ލިބިފައިވާ ކަމަށް ހައުސިން މިނިސްޓްރީން ހާމަ ކޮށްފިއެވެ.

ގެދޮރުވެރިޔާ ސްކީމުގެ ދަށުން ދޫކުރަން ނިންމާފައިވާ ފްލެޓްތަކުގެ ތެރެއިން ފުރަތަމަ 4،000 ފްލެޓް ލިބޭ މީހުންގެ ލިސްޓު މި މަހުގެ ހަތަރު ވަނަ ދުވަހު އާއްމު ކުރި އިރު ޕޮއިންޓު ލިބިފައިހުރި ގޮތާ މެދު އާންމުންގެ ކަންބޮޑުވުންތަކާއި ޝަކުވާތައް ހުރުމުން ލިސްޓަށް ޝަކުވާ ހުށަހަޅަން މި މަހުގެ 9 ވަނަ ދުވަހުގެ ހަވީރު 4 އާ ހަމައަށް އެ މިނިސްޓްރީން ވަނީ ފުރުސަތު ދީފައެވެ. އެހެން ނަމަވެސް ގިނަ ބައެއްގެ އެދުމުގެ މަތިން އެ މުއްދަތު ވަނީ ރޭގެ 11:59 އާ ހަމައަށް އިތުރުކޮށްފަ އެވެ.

މިކަމާއި ބޭހޭގޮތުން އެ މިނިސްޓްރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވީ ލިބިފައިވާ ޝަކުވާތަކަށް ބަލާއިރު ލިސްޓަށް ބޮޑު ބަދަލެއް އަންނަ ވަރުގެ ޝަކުވާއެއް ނުލިބޭ ކަމަށެވެ. މައިގަނޑު ޝަކުވާއެއްގެ ގޮތުގައި ލިބިފައިވަނީ، މާލޭގައި ދިގު މުއްދަތަކަށް ދިރިއުޅޭތީ ޕޮއިންޓް ލިބުނު ވަރު މަދުވެގެން ކަމަށް ވެސް އޭނާ ވިދާޅުވި އެވެ.

Advertisement

ގެދޮރުވެރިޔާ ސްކީމުގެ ދަށުން 4،000 ފްލެޓް އަޅަން ސަރުކާރުން ހަވާލުކޮށްފައިވަނީ ފަހި ދިރިއުޅުން ކޯޕަރޭޝަނަށެވެ. މިމަޝްރޫއުގައި ހިމެނޭ ޓަވަރުތަކުގެ ތެރެއިން ހަ ޓަވަރެއްގެ ފިނިޝިން މަސައްކަތް މިހާރު ވަރަށް ބާރަށް ކުރިއަށް އެބަދެ އެވެ.