މިދައުރުގެ ތެރޭގައި ގެނެވުނު އިޤުތިޞާދީ ހެޔޮ ބަދަލު ތަކަކީ، ދައުލަތުގެ އާމްދަނީ ދެގުނަ ކުރެވޭނެ ކަމެއް ކަމުގައި ޖުމްހޫރީ ދުވަހުގެ މުނާސަބަތުގައި ޤައުމާއި މުޚާތަބު ކުރައްވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނުގެ ރިޔާސީ ދައުރުގައި މުޅި ދުނިޔެއަށް ކުރިމަތިވި ކޯވިޑް-19ގެ ޢާލަމީ ވަބާ އާއި އެކަމާއި ގުޅިގެން މުޅި ދުނިޔެއަށް ކުރިމަތިވެގެންދިޔަ އިޤުތިޞާދީ ދަތިތަކުގެ މައްޗަށް އަލިއަޅުއްވައި ލައްވައި ރައީސް ވިދާޅުވީ ކޯވިޑް 19ގެ ޙާލަތުގައި، ރައްޔިތުންނަށް ބޭނުންވާ އަސާސީ އެންމެހައި ކަންކަން ފުރިހަމަކޮށްދީ، ތަރައްޤީގެ މަޝްރޫޢުތައްވެސް ހުއްޓާނުލައި ކުރިޔަށް ގެންދެވުނުކަމަށެވެ.

އެންމެ ފުރަތަމަ އާބާދީގެ އެންމެން ވެކްސިން ފުރިހަމަކުރި މަދުޤައުމުތަކުގެ ތެރޭގައި ދިވެހިރާއްޖެ ހިމެނުނުކަން ފާހަގަކުރައްވައި، އެންމެ ފުރަތަމަ ބޯޑަރު ހުޅުވާލެވުނު އެއްޤައުމަކަށް ދިވެހިރާއްޖެ ވެގެން ދިޔަކަންވެސް ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ. މީގެ އިތުރުން ކޮވިޑް 19 އަށް ފަހު ފަތުރުވެރިކަމާއި އިޤުތިޞާދު އިހުހުރި ހިސާބަށް ރުޖޫޢަކުރުމުގައި، ލިބުނު ކާމިޔާބީއަކީ ބޮޑު ކާމިޔާބީއެއްކަންވެސް ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.

"ކުރެވުނު ގިނަ މަސައްކަތުން އެންމެ ފުރަތަމަ ބޯޑަރ ހުޅުވި އެއް ޤައުމަކީ ރާއްޖެ. ފަތުރުވެރިކަމާއި އިޤްތިޞާދު، އިހުހުރި ހިސާބަށް ރުޖޫޢަވުމުގައި ލިބުނު ކާމިޔާބު ބޮޑު. ރައްޔިތުންނާއި ރާއްޖެ ސަލާމަތް ކުރުމުގައި ކޯވިޑް-19 އަކީ އަޅުގަނޑުގެ ޙަޔާތުގެ އިމްތިޙާނު. އެންމެ ގިނަ ރޭނިދިން އަޅުގަނޑު މަޙްރޫމްވާން މަޖުބޫރުވި ޙާލަތަކީ އެއީ." ރައީސް ވިދާޅުވިއެވެ.

ކޯވިޑް-19 އަކީ އާންމުކޮށް ދައުލަތުގެ ހުރިހާ ޚިދުމަތްތެރިންގެ ޤުރްބާނީ ޤައުމަށް ވެދުންކުރި ކާރިސާ ކަމަށާއި ވަކިން ޚާއްޞަކޮށް، ރާއްޖޭގެ ޞިއްޙީ ޚިދުމަތްތެރިންނާއި، ސިފައިންނާއި ފުލުހުން އެ ދެއްކެވި ފުރިހަމަ ނަމޫނާއަކީ ޤައުމަކުން ފެންނާނެ އެންމެ ރީތި މިސާލު ކަމުގައި  ރައީސް ގެ ޚިތާބުގައި ވަނީ ވިދާޅުވެފައެވެ.