ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ބޭނުންކުރާ ގްރައުންޑް ހޭންޑްލިން އިކުއިޕްމެންޓުތައް އާކޮށް އެ ތަކެތި ބޭނުން ކުރަން ފަށައިފި އެވެ.
އެއާޕޯޓުގެ އޭޕްރަން ސަރަހައްދުގައި ވަނީ އެއާޕޯޓުން ދޭ ހިދުމަތުގެ ފެންވަރު ރަނގަޅުކޮށް ހަރުދަނާ ކުރުމަށް ގްރައުންޑް ހޭންޑްލިންގައި ބޭނުންކުރާ ބައެއް ސާމާނު އާކޮށް ބޭނުންކުރަން ފެށުން ފާހަގަކުރުމަށް ހާއްސަ ރަސްމިއްޔާތެއް ވެސް ބާއްވައިފަ އެވެ.
ހިދުމަތް ދޭން ބޭނުންކުރާ ގިނަ އިކުއިޕްމެންޓުތަކެއް އާކޮށްފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ބުނެފައިވެއެވެ.
އެގޮތުން އާ ކުރުމަށް ފަހު ހިދުމަތުގައި ބޭނުންކުރަން ފެށި އިކުއިޕްމެންޓުގެ ތެރޭގައި:
4 ފަސިންޖާ ބަސް
4 އެއާކްރާފްޓް ސްޓެއާސް
2 ޔުނިވާސަލް ލޯޑާ
2 ހައި ލޯޑާސް
10 ބެގޭޖު ޓްރެކްޓަރު
މީގެ އިތުރުންވެސް 14 ސީޓުގެ މިނީ ވޭނެއް، 32 ސީޓުގެ ބަހެއް އަދި އެއާ ކޮންޑިޝަނިން ޔުނިޓެއް ގެ އިތުރުން 7 އިކުއިޕްމެންޓެއް ވަނީ އާކޮށް ވެލާނާ އިންޓަނޭޝަނަލް އެއާޕޯޓުގައި ބޭނުން ކުރަން ފަށާފައެވެ.
ރަސްމިއްޔާތުގައި މި ތަކެތީގެ ރަމްޒީ ތަޅުދަނޑި ވަނީ އެ ކުންފުނީގެ އޮޕަރޭޝަނުގައި އުޅޭ ސްޓާފުންނާ ހަވާލުކޮށްފައިއެވެ.
ކުރިއަށް އޮތްތަނުގައި އިތުރު އާ އިކުއިޕްމެންޓު ހިދުމަތަށް ގެންނާނެ ކަމަށާއި،ހިދުމަތަށް އަލަށް ގެނައި ސާމާނަކީ ވީއައިއޭ އަށް އޮޕަރޭޓު ކުރާ އެއާލައިންތަކަށް ދޭ ހިދުމަތް އިތުރަށް ހަރުދަނާކޮށް ފެންވަރު ރަނގަޅު ކުރުމަށް ގެނައި ސާމާނު ކަމަށް ވެސް އެމްއޭސީއެލް އިން ބުންޏެވެ.
Advertisement
This content is created and paid for by advertisers and does not involve Voice Journalists
