1968 ގެ ފަހުން ރާއްޖޭގެ ވެރިކަން ހުރިހާ ފަހަރަކުވެސް ބަދަލުވަމުން އައިސްފައިވަނީ ޤާނޫނީ ހަމަތަކުގެ މަތިން އަމާންކަމާއި އޮމާންކަމާ އެކު ކަމުގައި ކަމަށާއި މިއީ ރާއްޖޭގައި އަލަށް އަމާންކަމާއި އެކު ވެރިކަން ބަދަލުވާ ފުރަތަމަ ފަހަރު ނޫންކަމަށް ކުރީގެ ރައީސް މައުމޫން އަބްދުލް ޤައްޔޫމް ވިދާޅުވެއްޖެއެވެ.
މިފަދައިން ރައީސް މައުމޫން ވިދާޅުވެފައިމިވަނީ ޖުމްހޫރީ ދުވަހުގެ މުނާސަބާތުގައި މިއަދު ގައުމާއި މުޚާތަބު ކުރައްވަމުން, ރާއްޖޭގައި ރިޔާސީ ވެރިކަން ކުރަން ފެށުމަށް ފަހު އަމާން ކަމާއި އެކު ވެރިކަން ބަދަލު ވަނީ އަލަށް ކަމަށް މިހާރުގެ ރައީސް އިބްރާހިމް މުޙައްމަދު ސޯލިހު ވިދާޅުވުމާއި ގުޅިގެން ކުރެއްވި ޓްވީޓެއްގައެވެ.
"ނުހަނު އިޙްތިރާމާއެކު ދަންނަވަން. 1968 ގެ ފަހުން ރާއްޖޭގެ ވެރިކަން ހުރިހާ ފަހަރަކުވެސް ބަދަލުވަމުން އައިސްފައިވަނީ ޤާނޫނީ ހަމަތަކުގެ މަތިން އަމާންކަމާއި އޮމާންކަމާ އެކު. މިފަހަރު އެކަންޏެއް ނޫން."
މައުމޫން އަބްދުލް ޤައްޔޫމް
މިއަދު ރައީސް ޞާލިހު ދެއްވި ޚިތާބުގައި ވިދާޅުވެފައިވަނީ އެމަނިކުފާނު ވެރިކަން ކުރެއްވި ފަސް އަހަރު ތެރޭގައި ރާއްޖޭގައި ބޮއްސުންލާފައިވާ ގިނަ ކަންކަމަށް ނިމުން ގެނެސް ވަރަށް ގިނަ ކަންކަން ބަދަލުކޮށްދެވިއްޖެ ކަމަށެވެ.
އޭގެ ތެރެއިން އެންމެ ފާހަގަކޮށްލެވޭ އެއް ކަމެއްގެ ގޮތުގައި ރައީސް ވިދާޅުވީ އޮމާންކަމާއެކު ކުރިއަށް ދިޔަ ރިޔާސީ އިންތިހާބެވެ. މީގެ ކުރީގައި ވޯޓުން ކާމިޔާބު ނުވެއްޖެނަމަ ދަނީ ކޯޓަށް ކަމަށާއި، މިފަހަރު އެކަހަލަ އެއްވެސް ކަމެއް ނެތް ކަމަށް ވިދާޅުވި އެވެ.
"ގިނަ ޕާޓީ އެކުލެވޭ ސިޔާސީ ނިޒާމަށް ރާއްޖެ ބަދަލުވިފަހުން، އޮމާންކަމާއެކު ވެރިކަން ބަދަލުވުމުގެ މަރުހަލާ ހިނގަމުން މިދަނީ ހަމައެކަނި މިފަހަރު. މީގެ ކުރިން މިކަން ހިނގާފައި އޮތީ ވޯޓުން ނުވިއްޔާ ކޯޓުން، ނުވަތަ މަގުމަތިން،" ރައީސް ވިދާޅުވި އެވެ.
.
Advertisement
This content is created and paid for by advertisers and does not involve Voice Journalists
