ނަޝީދުގެ އިތުބާރު ނެތްކަމަށް ހުށައަޅާފައިވާ މައްސަލައިގެ ގަރާރު މަޖިލީހުގެ ރިޔާސަތުން ބޭރުކޮށްލުމަކީ މަޖިލީހުގެ 49 މެމްބަރުންގެ އިމްތިޔާޒަށް އަރައިގަތުން ކަމަށް މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވެއްޖެ އެވެ. 

ނަޝީދުގެ އިތުބާރުނެތްކަމަށް މަޖިލީހަށް ހުށައަޅާފައިވަނީ 49 މެމްބަރުންގެ ސޮޔާއެކުގައެވެ. އެ މައްސަލަ ހުށައެޅުމާއެކު ނަޝީދަށް ވަނީ މަޖިލީހުގެ ގަވައިދު ބަޔާންކުރާ 14 ދުވަހުގެ ނޯޓިސްވެސް ދީފައެވެ. 

އެހެން ނަމަވެސް ނޯޓިސް މުއްދަތު ހަމަވުމާއެކު އެކު ބޭއްވި ފުރަތަމަ ޖަލްސާއަށް މަޖިލީހުގެ ނައިބު ރައީސް އީވާ އަބްދުﷲ ހާޒިރުވެވަޑައިގެންފައި ނުވާތީއާއި، އެފަހުންވެސް އެ މައްސަލައާއި ގުޅިގެން ޖަލްސާއެއް ކުރިއަށް ގެންދެވޭގޮތް ނުވުމުން، އެ މައްސަލަ ކުރިއަށް ގެންދެވޭނެ ގޮތެއް ކަނޑައަޅައިދިނުމަށް އެމްޑީޕީން ސުޕްރިމް ކޯޓަށް ދުސްތޫރީ މައްސަލައެއް ހުށައެޅިއެވެ. 

އެ މައްސަލަ ބައްލަވާ ސުޕްރިމް ކޯޓުން ނިންމެވީ މަޖިލީހުގެ ރައީސް ވަކިކުރަން ހުށައަޅާ މައްސަލަ ބައްލަވާ ޖަލްސާގެ ރިޔާސަތުގައި ނައިބުރައީސް އިނުން ލާޒިމް ނޫންކަމަށެވެ. އަދި ނައިބު ރައީސާއި ނުލާ ވެސް އެ މައްސަލަ ކުރިއަށް ގެންދެވޭނެ ކަމަށެވެ. 

އެއާއެކު މިއަދު ޖަލްސާއެއް އެޖެންޑާކޮށް މަޖިލީހުގެ ރިޔާސަތުގައި ވިލިފުށީ ދާއިރާގެ މެމްބަރު ހަސަން އަފީފު އިނަންނަވާ ފެއްޓެވިއެވެ. 

އެހެން ނަމަވެސް ޖަލްސާ ހަމަ ފެއްޓެވުމާއެކު ދަ ޑިމޮކްރެޓސްއަށް ނިސްބަތްވެވަޑައިގަންނަވާ މަޖިލީހުގެ މެދުހެންވޭރު ދާއިރާގެ މެމްބަރު އަލީ އާޒިމް ވަނީ ނިޒާމީ ނިކުތާއެއް ނަންގަވާ އިތުބާރު ގަރާރު ހުށައަޅާފައިވަނީ ގަވައިދާއި ޚިލާފަށްކަމަށާއި، ގަވައިދުގައި ބުނާ ސިފަތައް އެ ގަރާރުގައި ފުރިހަމަނުވާކަން ފާހަގަކޮށް އެ ގަރާރު ބަލައިނުގަތުމަށް ރިޔާސަތަށް ދަންނަވާފައެވެ. 

ޑިމޮކްރެޓސްގެ ގިނަ މެމްބަރުން އާޒިމްގެ އެ ނިޒާމީ ނުކުތާއަށް ތާއީދުކޮށްފައިވާއިރު، އެ ޕާޓީއަށް ނިސްބަތްވާ މެމްބަރުން މިއަދު ވަނީ އެ ގަރާރު ބަލައިނުގަތުމަށް އެދި މަޖިލީހުގައި އިހުތިޖާޖު ވެސް ކޮށްފައެވެ. 

ނިޒާމީ އޮއިވަރެއްގައި ޖެހި، މިއަދުގެ ޖަލްސާވެސް ހޫނުވެގެން ގޮސްފައިވަނިކޮށް، ރިޔާސަތުގައި އިންނަވާ އަފީފު ނިންމެވީ އެ ގަރާރު މަޖިލީހުގައި ގަވައިދާއި ޚިލާފުކަމަށެވެ. އެއާއެކު އޭނާ ވަނީ ޖަލްސާ ނިންމަވާލެއްވުމަށްފަހު ވަޑައިގެންފައެވެ. 

އެކަމަށް އިޝާރާތްކުރައްވާ ނިޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ މިއަދުގެ ޖަލްސާގައި ރިޔާސަތުން މަޖިލީހުގެ 49 މެމްބަރުންގެ އިމްތިޔާޒަށް އަރައިގެންފައިވާ ކަމަށެވެ. އަދި އެ މައްސަލަ ބަލާ ފިޔަވަޅު އަޅަންޖެހޭނެ ކަމަށެވެ. 

ނިޔާޒުގެ އިތުރުން ވެސް އެމްޑީޕީގެ ގިނަ މްމެބަރުން ވަނީ މިއަދު މަޖިލީހުގެ ރިޔާސަތުން އަމަލުކުރި ގޮތާއި ގުޅިގެން ނުރުހުން ފާޅުކޮށްފައެވެ.

އެގޮތުން އެމްޑީޕީގެ މެމްބަރުން ވަނީ މަޖިލީހުގެ އަގުލަބިއްޔަތަށް އިތުބާރު ނެތް ބޭފުޅަކު ރިޔާސަތުގައި އިދިގެން ނުވާނެކަމަށް ވިދާޅުވެފަ އެވެ. އަދި ސުޕްރިމް ކޯޓުގެ ނިންމެވުމަށް އިޚްތިރާމުކޮށް އެ މައްސަލައިގެ ވޯޓު ނެގުމަށް މެމްބަރުން ވަނީ ގޮވާލާފައެވެ.