ބިދޭސީއަކު ރަހީނު ކުރި މައްސަލައެއްގައި އެހެން ބިދޭސީއަކު ބަންދުގައި ބެހެއްޓުމަށް ކްރިމިނަލް ކޯޓުން ޙުކުމް ކޮށްފިއެވެ.

ޕްރޮސިކިއުޓާ ޖެނެރަލްގެ އޮފީހުން އެދިގެން ކްރިމިނަލް ކޯޓުން އިއްޔެ ނެރުނު އަމުރުގައިވާ ގޮތުން މި މައްސަލާގައި ހައްޔަރުކުރީ ބަންގުލަދޭޝް މީހެއް ކަމަށްވާ މުހައްމަދު އާރިފް ހޮސައިން، 37، އެވެ.

ކޯޓު އަމުރުގައި ވަނީ މުހައްމަދުގެ މައްޗަށް ތުހުމަތު އުފެދޭ ވަރަށް ހެކި ހުށަހަޅާފައި އެބަހުރި ކަމަށް ބުނެފައެވެ. ހުށަހަޅާފައިވާ ބަޔާންތަކުންނާއި، އަނިޔާލިބުނު މީހާ އެ ހާދިސާ ހިނގި ސަރަހައްދުން ނަގާފައިވާ ފޮޓޯތަކުން އޭނާ މީހަކު ރަހީނުކޮށް އިންޒާރުދީ އަނިޔާވެރި އަމަލުތަކެއް ހިންގުމުގައި ބައިވެރިވެފައިވާ ކަމަށް ފެންނަ ކަމަށް އަމުރުގައިވެ އެވެ.

Advertisement

މުހައްމަދަކީ ޤަވައިދާ ޚިލާފަށް ރާއްޖޭގައި އުޅޭ މީހެއް ކަމަށާއި އެހެންވެ އޭނާ ފިލައިގެން ގޮސްފާނެތީ އާއި މުޖުތަމައުގެ ސަލާމަތަށްޓަކައި ބަންދުގައި ބަހައްޓަން ގާޒީ ވަނީ ނިންމަވައިފައެވެ.

ޕީޖީން ބުނެފައިވާ ގޮތުގައި ކުށުގެ ޢަމަލު ހިންގުމުގައި އިތުރުބަޔަކާ އެކު މުހައްމަދު ބައިވެރިވެ، ރަހީނުކުރި މީހާ އަށް އަނިޔާ ވެސް ކޮށްފައިވެ އެވެ.

އާމްދަނީ ހޯދުމަށް މަަސައްކަތް ކުރުމަށް ރަާއްޖެ އަށް އަންނަ ބިދޭސީންގެ ކިބައިން ކުށްތަކަށް އަރައިގަތުން މިހާރު ދަނީ ގިނައިން ފެންނަމުންނެވެ. އެގޮތުން މީހުނަށް އަނިޔާކޮށް ފައިސާ ފޭރުމާއި ރަހީނުކުރުމާއި މީހުން މެރުން ފަދަ ނުރައްކާތެރި ކުށްތަކުގައިވެސް ބިދޭސީން ދަނީ ބައިވެރިވަމުންނެވެ.