އިތުރު ބެޗުތަކުގައި ކެމިކަލް ހުރެގެން، އެލާގޯ ބްރޭންޑްގެ ސިޓްރަޒިން ރާއްޖެ އެތެރެކުރުން މަނާކޮށްފިއެވެ.
މިއަދު އެމްއެފްޑީއޭއިން ބުނީ އެކެއްސުމާއި ހުމާއި އަދި ރޯގާއަށް ބޭނުންކުރާ ދިޔާ ބޭހުގެ އިތުރު ބެޗުތައް ސްކްރީންކުރިއިރު ހުރިހާ ބެޗެއްގައިވެސް ގްލައިކޯލް (ޑީއީޖީ) އަދި އިތަލީން ގްލައިކޯލް (އީޖީ) ހުރިކަން މިހާރު ކަށަވަރުވެފައިވާ ކަމަށެވެ. އެހެންކަމުން މިއަދުން ފެށިގެން އެ ބޭހުގެ އެލާގޯ ބްރޭންޑްގެ އެއްވެސް ބެޗެއް ރާއްޖެ އެތެރެކުރުމާއި ވިއްކުމާއި ބޭނުންކުރުމަކީ މަނާ ކަމެއް ކަމަށް އެމްއެފްޑީއޭއިން ވަނީ ބުނެފައެވެ.
މިދިޔަ އަހަރުގެ އޮކްޓޯބަރު މަހުން ފެށިގެން ދުނިޔޭގެ އެކި ކަންކޮޅުތަކުން އުފައްދާ ކެއްސުމާއި ހުމާއި އަދި ރޯގާއަށް ބޭނުންކުރާ ދިޔާ ބޭހުގައި ކެމިކަލް މާއްދާއެއް ކަމަށްވާ ޑައިތަލީން ގްލައިކޯލް (ޑީއީޖީ) އަދި އިތަލީން ގްލައިކޯލް (އީޖީ) ހިމެނޭ ކަމަށް ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ) އިން ކޮށްފައިވާ އެލާޓްތަކާ ގުޅިގެން ރާއްޖެއިން ވެސް ރެންޑަމްކޮށް ސާމްޕަލް ނަގާ ސްކްރީން ކުރުމުގެ މަސައްކަތް ކުރަމުން ދާތީ މިދިޔަ އަންގާރަ ދުވަހު އެމްއެފްޑީއޭއިން ވަނީ އެ ބޭސް ބޭނުން ނުކުރުމަށާއި ނުވިއްކުމަށް އަންގާފައެވެ.
މިބޭހުގެ އިތުރުންވެސް މިދިޔަ ބުރާސްފަތި ދުވަހުވެސް ވަނީ ކޮލިޓީގެ މައްސަލަތަކެއް ފާހަގަ ކުރެވިގެން ކުޑަކުދިންނަށް ދޭ ދިޔާ ބޭހެއް ކަމަށްވާ ޕެރެސެޓެމޯލް ވިއްކުމާއި ބޭނުން ކުރުން މަނާކޮށްފައެވެ.
އެމްއެފްޑީއޭއިން ވަނީ އެކަމަށް އެންމެހާ ރައްޔިތުން ސަމާލުވުމަށް އެދިފައެވެ. އަދި އެ ބޭސް ރާއްޖެ އެތެރެކޮށް ވިއްކާ ފަރާތްތަކުން ބޭސް ނައްތާލުމަށް ހަމަޖެހިފައިވާ އުސޫލާއި އެއްގޮތަށް ނައްތާލުމުގެ ކަންކަން ކުރިއަށް ގެންދެވުމަށްވެސް އެމްއެންޑީއޭއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
