މިއަހަރުގެ ތިންވަނަ ކުއަރޓަރގައި މޯލްޑިވްސް އިސްލާމިކް ބޭންކް، (އެމްއައިބީ) އަށް 123.55 މިލިއަން ރުފިޔާގެ އާމްދަނީއެއް ލިބިއްޖެއެވެ.

އެމްއައިބީން އާންމުކުރި އެ ކުންފުނޯގެ ތިންވަނަ ކުއަރޓަރގެ މާލީ ރިޕޯޓު ދައްކާގޮތުގައި މިއަހަރު ތިންވަނަ ކުއާޓާގައި އެކުންފުންޏަށް ވަނީ 123.55 މިލިޔަން ރުފިޔާގެ އާމްދަނީއެއް ލިބިފައެވެ. މިއީ ދެވަނަ ކުއަރޓަރ ގައި އެ ކުންފުންޏަށް ލިބުނު އާމްދަނީ އާއި އަޅާ ބަލާއިރު 12.07 އިންސައްތަ އިތުރު އަދަދެއް ކަމަށް ތިންވަނަ ކުއާޓަރުގެ މާލީ ރިޕޯޓުގައި ބުނެފައިވެއެވެ. 

މިއަހަރު ދެވަނަ ކުއާޓާގައި އެމްއައިބީިއަށް ލިބިފައިވަނީ 110.24 މިލިއަން ރުފިޔާގެ އާމްދަނީއެކެވެ.

މީގެ އިތުރުން މިއަހަރުގެ ތިންވަނަ ކުއަރޓަރގައި އެމްއައިބީއަށް ލިބިފައިވާ އާމްދަނީއަކީ މިދިޔަ އަހަރުގެ ތިންވަނަ ކުއަރޓަރއާއި އަޅާބަލާއިރު 46.8 އިންސައްތަ އިތުރު އަދަދެކެވެ. 2022 ވަނަ އަހަރު ތިންވަނަ ކުއާޓާގައި އެމްއައިބީއަށް ލިބިފައިވަނީ 84.11 މިލިއަން ރުފިޔާގެ އާމްދަނީއެކެެވެ.

ހަމަ އެޔާއެކު އެމްއައިބީގެ މާލީ ރިޕޯޓުގައި ބުނާގޮތުން ހިންގުމުގެ ޚަރަދު ދެވަނަ ކުއާޓަރުގައި 53.75 މިލިއަން ރުފިޔާގައި ހުރިއިރު ތިންވަނަ ކުއާޓާގައި އެ އަދަދު ވަނީ 53.97 މިލިއަން ރުފިޔާ އަށް އަރާފައެވެ.

އެހެންކަމުން ސާފު ފައިދާގެ ގޮތުގައި ތިންވަނަ ކުއާޓާގައި އެމްއައިބީއަށް ލިބިފައިވަނީ ޖުމުލަ 53.14 މިލިޔަން ރުފިޔާއެވެ.  މި އަހަރުގެ 2 ވަނަ ކުއާޓަރުގައި ސާފު ފައިދާގެ ގޮތުގައި އެ ބޭންކަށް ލިިބިފައިވަނީ 40.20 މިލިއަން ރުފިޔާއެވެ. އެހެންކަމުން މިކުއާޓާގައި އެ ކުންފުންޏަށް ލިބުނު ސާފު ފައިދާ މިވަނީ ބޮޑުތަނުން އިތުރުވެފައެވެ.

ބޭންކުގެ މާލީ ރިޕޯޓުގައިވާގޮތުން އެ ކުންފުންޏަށް ލިބުނު ސާފު ފައިދާގެ މިންވަރުވަނީ 44.14 އިންސައްތައަށް އިތުރުވެފައެވެ. އެގޮތުން މިދިޔަ އަހަރުގެ ތިންވަނަ ކުއާޓަރުގައި އެކުންފުންޏަށް ސާފު ފައިދާގެ ގޮތުގުގައި ލިބިފައިވަނީ 36.86 މިލިއަން ރުފިޔާއެވެ.

2011 ވަނަ އަހަރުގެ މާރިޗް މަހުގެ 7 ވަނަ ދުވަހު ރަސްމީކޮށް ހުޅުވައި ޚިދުމަތް ދޭންފެށި އެމްއައިބީއަކީ ސަރުކާރު ހިއްސާވާ ކުންފުންޏެކެވެ.