ޔޫރަޕްގެ ޝެންގެން ޤައުމުތަކުގެ ވިސާއަށް ވީއެފްއެސް މާލެ ވިސާ ސެންޓަރ މެދުވެރިކޮށް އެޕްލައި ކުރެވޭ ގޮތް ފޮރިން މިނިސްޓްރީ އިން ހަދައިފިއެވެ.

އެމިނިސްޓްރީ އިން ބުނެފައިވަނީ ޔޫރަޕްގެ ޤައުމުތަކަށް ދަތުރުކުރާ ދިވެހިންނަށް ލުއިފަސޭހަކަމާއެކު ވިސާއަށް އެޕްލައިކުރެއްވޭނެ އިންތިޒާމް ހަމަޖައްސައިދިނުމަށްޓަކައި މިމިނިސްޓްރީ އިން ކެނޑިނޭޅި ކުރަމުންގެންދާ މަސައްކަތްތަކުގެ 1 މާރިޗު 2022 ގައި ވީ.އެފް.އެސް. ގްލޯބަލް ޖޮއިންޓް ޝެންގެން ވިސާ އެޕްލިކޭޝަން ސެންޓަރު އެއް މާލޭގައި ވަނީ ހުޅުވިފައި ވާކަމަށެވެ.

އަދި މި ސެންޓަރު މެދުވެރިކޮށް ޔޫރަޕުގެ ގިނަ ޤައުމުތަކަކަށް ޝެންގެން ވިސާއަށް ރާއްޖެއިން އެޕްލައިކުރުމުގެ ފުރުޞަތު ތަނަވަސްވުމުގެ ސަބަބުން ޝެންގެން ވިސާ ހޯދުމަށް މީގެ ކުރިން އުފުލާންޖެހުނު ތަކުލީފުތައް ނައްތާލެވި، ވަރަށް ބޮޑު ލުއިފަސޭހައެއް ލިބިގެންދިޔަކަމަށް އެ މިނިސްޓްރީން ދެކޭ ކަމަށް އެމިނިސްޓްރީ އިން ބުނެފައިވެއެވެ.

އެމިނިސްޓްރީ އިން ބުނެފައިވަނީ އެ ޚިދުމަތް އިތުރަށް ފުޅާކުރުމަށް އެ މިނިސްޓްރީ އިން ޝެންގަން ޒޯނުގައި ހިމެނޭ ޤައުމުތަކުގެ ޚާރިޖީ ވުޒާރާތަކާއެކު ކުރެވުނު ކާމިޔާބު މަޝްވަރާތަކުގެ ނަތީޖާއެއްގެ ގޮތުން ވީ.އެފް.އެސް. މާލެ ވިސާ ސެންޓަރާ ރަސްމީކޮށް ސްވިޓްޒަލެންޑް އިން 21 އޮގަސްޓް 2023 ގައި ވަނީ ގުޅިފައި ކަމަށެވެ.

އެހެންކަމުން މި ސެންޓަރު މެދުވެރިކޮށް ސްވިޓްޒަލެންޑް، ބެލްޖިއަމް، ނެދަރލެންޑްސް، ޕޮލެންޑް، ލަގްޒެމްބޮރގް އަދި ސްލޮވީނިއާ ޝެންގަން ވިސާއަށް މިހާރު އެޕްލައި ކުރެވޭނެ ކަމަށް އެމިނިސްޓްރީ އިން ބުނެފައިވެއެވެ.

މީގެ އިތުރުން މިއަދު (12 ނޮވެމްބަރު 2023) އިން ފެށިގެން ފްރާންސް، ސްޕެއިން އަދި ޕޯޗުގަލް ގެ ޝެންގަން ވިސާއަށް ވީ.އެފް.އެސް. މާލެ ސެންޓަރުން އެޕްލައިކުރެވޭނެ އިންތިޒާމު މިހާރު ހަމަޖެހިފަައިވާ ވާހަކަ ފާހަގަކޮށް އެކަން އިޢްލާނުކުރާ ކަމަށް އެމިނިސްޓްރީ އިން ބުނެފައިވެއެވެ.