17 ނޮވެމްބަރ 2018 ވަނަ ދުވަހު ހަވާލުކުރެވުނު މަގާމުގެ މަސްޢޫލިއްޔަތު އަދާކުރުމަށްފަހު ދައުރު ނިންމަވައި ގެއަށް ވަޑައިގަންނަވަނީ ވަރަށްވެސް ހިތްހަމަޖެހުމާއެކު ކަމަށް ޔޫތު މިނިސްޓަރު އަހްމަދު މަހްލޫފް ވިދާޅުވެއްޖެއެވެ.

މިއަދު ކުރެއްވި ޓްވީޓެއްގައި މަހްލޫފް ވިދާޅުވެފައި ވަނީ މިއިން ޒަމާނަކު ޔޫތު މިނިސްޓްރީގެ މެންޑޭޓުގެ ތެރެއިން ނުކުރާހާ ގިނަ މަސައްކަތް އެބޭފުޅާގެ މިނިސްޓަރު ކަމުގެ ދަށުން ކޮށްފައިވާނެ ކަމަށެވެ.

އެގޮތުން 700 އާއި ގާތްކުރާ އަދަދަށް ތަރައްޤީގެ ޕްރޮޖެކްޓުތައް ރާއްޖޭގެ އެކިކަންކޮޅުތަކުގައި ނިމި އަދި ކުރިއަށް ދާނެކަމަށާ، އަދި މަގާމުގައި ހުންނަވައިގެން 750 އަށްވުރެ ގިނަ ދަތުރު ރާއްޖޭގެ އެކި ރަށްރަށަށް ކޮށް ޒުވާނުންނާއި ބައްދަލުކޮށް ޙިޔާލުބަދަލުކޮށް ކަންބޮޑުވުން އަޑުއެހުނުކަމަށް ވިދާޅުވި އެވެ. ހަމައެހެންމެ 600 އަށްވުރެ ގިނަ ފަހަރު ކައުންސިލް ތަކާއިއެކު ބައްދަލުކުރެވުނު ކަމަށްވެސް މިނިސްޓަރ މަހުލޫފް ވިދާޅުވިއެވެ.

Advertisement

ރާއްޖޭގެ ކުޅިވަރަށް އިންގިލާބީ ބަދަލެއް ގެނެސް ތާރީހުގައި ލިބުނު އެންމެ ބޮޑެތި ބައިނަލްއަޤުވާމީ ކާމިޔާބީ ހޯދައިދިނުމުގައި އިސް ދައުރެއް އަދާކޮށްދެވުނުކަމުގެ އުފާ ލިބޭ ކަމަށާއި މިކަންކަމުން މަސައްކަތްކުރެވުނު ކަމުގެ އަދި މަސައްކަތް ކުރެވޭތޯ އުޅެވުނު ކަމުގެ ހިތްހަމަޖެހުން ލިބޭ ކަމަށް ވެސް މަހުލޫފް ކުރެއްވި ޓްވީޓްގައި ވެއެވެ.

"55 ބޮޑު ފުޓުބޯޅަ ދަނޑުގެ މަސައްކަތް ނިންމާ 100 އަށްވުރެ ގިނަ ރަށްރަށުގައި މަސައްކަތް ކުރިއަށްދާއިރު، މަސައްކަތް ނުފަށާ ރަށްރަށުގެ ޝަކުވާއެއް އޮންނާނެ. 40 އަށް ވުރެ ގިނަ ވޮލީ ކޯޓު ނިންމާ، 50 ވަރަކަށް ރަށުގައި މަސައްކަތް ކުރިއަށްދާއިރު ބާކީ ހުރި ރަށްރަށުގައި އެމަސައްކަތް ނުކުރެވޭތީ އެވާހަކަ ބުނާނެ. 160 އަށް ވުރެ ގިނަ ރަށަށް ކުޑަކުދިންގެ ޕާކު ފޮނުވިއިރު ނުލިބެ ރަށްރަށުން ނުލިބޭ ކަމުގެ ޝަކުވާ ކުރާނެ. ދަންނަވަން މިއުޅެނީ ކިތަންމެ މަސައްކަތެއް ކުރެވުނަސް ނުވެ އޮންނަ ކަންތަކުގެ ނުވަތަ ނުކުރެވޭ ކަންތަކުގެ ވާހަކަ މިއަދު ދަށްކާނެކަން. އަދި އެއީ މައްސަލައެއްވެސް ނޫން. ނަމަވެސް އެއްވެސް ރަށެއްގެ މަސައްކަތެއް ގަސްތުގައި ދޫކޮށްލާފައި ނުވާނެ. އަބަދުވެސް ބެލީ ހުރިހަ ރަށަކަށްވެސް ވީހާވެސް ގިނަ މަސައްކަތް ކޮށްދެވޭތޯ." މަހްލޫފް ވިދާޅުވި އެވެ. 

ކުރެވުނު މަސައްކަތަށް ޖުމްލަކޮށް ވަރަށް ހިތްހަމަޖެހިފައި ކަމަށް ވިދާޅުވެ މިވޭތުވި 5 އަހަރު ތެރޭގައި އެގުމާއި ނޭގުމުގެ ތެރެއިންނަމަވެސް އެއްވެސް ރަށަކަށް އަދި އެއްވެސް ރައްޔިތަކަށް ދެރައެއް ނުވަތަ ތަފާތެއް ކުރެވިފައިވާނަމަ މަހްލޫފް ވަނީ މަޢާފަށް އެދިފައެވެ.

މަހްލޫފްގެ ޓްވީޓް ނިންމާލަމުން ވަނީ ވެރިކަމާއި ހަވާލުވެވަޑައިގަންނަވާ ޑރ. މުއިޒުގެ ސަރުކާރަށް، ހާއްސަކޮށް ޔޫތު މިނިސްޓްރީގެ ޒިންމާއާއި ހަވާލުވެވަޑައިގަންނަވާ މިނިސްޓަރަށް ކާމިޔާބަށް އެދިލައްވާފައެވެ.