ރިޔާސީ އިންތިހާބުގައި ވެވަޑައިގެންނެވި ވައުދާއި އެއްގޮތަށް ބަޖެޓުން މީޑިއާ ތަކަށް ވަކި އިންސައްތައެއް ކަނޑައަޅުއްވާނެކަމަށް އިންތިހާބީ ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އިންތިހާބީ ރައީސް މިފަދައިން ވިދާޅުވީ މިރޭ ނޫސްވެރިން ގެ ކަންބޮޑު ވުން ތަކާއި ޚިޔާލު ތައް ފާޅު ކުރުމަށް ބޭއްވި ނޫސްވެރިންގެ ގުންޒަރުގައި ވާހަކަފުޅު ދައްކަވަމުންނެވެ.
މުއިއްޒު ވިދާޅުވީ މިއަހަރުގެ ބަޖެޓަށް ޚިޔާލު ފާޅުކުރުމަށް ލިބުނު ވަގުތު ކުޑަ ވުމުގެ ސަބަބުން ނޫސްވެރިކަމަށް ދޭނެ ވަކި އިންސައްތައެއް މަޝްވަރާ ނުކުރެވުމުގެ ސަބަބުން ކަނޑައެޅިގެން ފެންނަން ނޯންނާނެ ކަމަށެވެ. އެހެން ނަމަވެސް މާލިއްޔަތު ކޮމެޓީގައި ބަޖެޓް މަޝްވަރާ ކުރެވޭނެ ކަމަށާއި ރައްޔިތުންގެ މަޖިލީހުގެ ތެރެއިން މަސައްކަތް ކޮށް ވަކި އިންސައްތަ އެއް ދައުލަތުގެ ބަޖެޓުން ނޫސްވެރިންނަށް ދިނުމަށް ނިންމާފައި ވާކަމަށް މުއިއްޒު ގެ ވާހަކަ ފުޅުގައި ވިދާޅުވިއެވެ.
"މާލިއްޔަތު ކޮމެޓީގައި ބަޖެޓް މަޝްވަރާ ކުރެވޭނެ. ކަމާ ބެހޭ ބަޖެޓް ކޮމެޓީގައި މަޝްވަރާ ކުރެވޭނެ. އެހެންވީމައި އަޅުގަނޑުމެން ގަސްތު ކޮށްފައި މިއޮތީ ބަޖެޓުގެ މަރުހަލާގެ ތެރޭގައި ރައްޔިތުންގެ މަޖިލީހުގެ ތެރެއިން މަސައްކަތް ކުރަން އެކަމަށް." މުއިއްޒު ވިދާޅުވިއެވެ.
މީގެ އިތުރުން ވެސް ނޫސް ވެރިންނާއި މުހާތަބު ކުރައްވަމުން އިންތިހާބީ ރައީސް ވަނީ 17 ނޮވެމްބަރުގައި ވެރިކަމާއި ހަވާލުވާ އާ ސަރުކާރަކީ ނޫސްވެރިންނާއި އެކީގައި ނޫސްވެރިންގެ ހުރިހާ ސުވާލު ތަކަށް ޖަވާބުދާރިވާ އަދި ހުރިހާ މައުލޫމާތު ތަކެއް ފޯރުކޮށްދޭނެ ސަރުކާރަކަށް ވެގެން ދާނެ ކަމުގެ ޔަގީން ކަން އަރުވާފަ އެވެ.
ނޫސްވެރިންގެ ގުންޒަރުގައި ވަނީ ނޫސްވެރިކަމުގައި ދިމާވާ ގޮންޖެހުން ތަކާއި ނޫސްވެރިކަން ކުރިއެރުވުމަށް ރާއްޖޭގެ އެކި އެކި ނޫސްވެރިން ހިޔާލު ފާޅުކޮށްފައެވެ.
Advertisement
This content is created and paid for by advertisers and does not involve Voice Journalists
