ސަރުކާރުގެ ވުޒާރާތައް އެކުލަވާލާއިރު އިންފޮމޭޝަން މިނިސްޓްރީގެ މެންޑޭޓު ހިމެނޭ ގޮތަށް އިންތިޒާމްތައް ހަމަޖައްސަވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ކަމުގެ ހުވާ ރަސްމީކޮށް ކުރެއްވުމުގެ ކުރިން ރާއްޖޭގެ ހުރިހާ ނޫސްވެރިންނަށް 'ނޫސްވެރިންގެ ގުންޒަރު' ގެ ނަމުގައި ސޯޝަލް ސެންޓަރުގައި ބޭއްވި ބައްދަލުވުމުގައި މުއިއްޒު ވިދާޅުވީ، ނޫސްވެރިކަމާ ގުޅުންހުރި ހުރިހާ ކަމެއް ކުރެވޭނެ މެންޑޭޓް ނުވަތަ އިންފޮމޭޝަމް މިނިސްޓްރީގެ މެންޑޭޓެ ހިމެނޭ ވުޒާރާއެއް އާ ސަރުކާރުގައި ހުންނާނެ ކަމަށެވެ.
އެކަން އެގޮތަށް ކުރައްވަން ނިންމާފައިވަނީ ނޫސްވެރިކަން އިތުރަށް ކުރިއަރުވާ އެދާރާއިން ތަމްރީނާއި ތައުލީމުގެ ފުރުސަތުތައް ފަހިކޮށްދެއްވުމަށް ކަމަށް ވެސް ވިދާޅުވިއެވެ.
އިންތިހާބީ ރައީސް ވިދާޅުވީ، ފެށިގެން ދާ ސަރުކާރަކީ ނޫސްވެރިންގެ ހުރިހާ ސުވާލުތަކަށް ދެފުށް ފެންނަ ގޮތަށް ޖަބާވުދާރީ ވާނެ ސަރުކާރަށް ވާނެ ކަމަށެވެ.
"ރައްޔިތުންނަށް ހިދުމަތް ކުރަން ނުކުންނަ މީހަކު ރައްޔިތުންނަށް ފޮރުވަން ޖެހޭ އެއްޗެއް އޮވެގެން ނުވާނެ، ރައްޔިތުން ކަމަކަށް އެދެފިނަމަ އެކަމެއް ސާފުކޮށް ބަޔާންކޮށްދެވެން ވާނެ" މުއިއްޒު ވިދާޅުވިއެވެ.
އަދި އެއީ ކެމްޕެއިންގެ ވައުދެއް ކަމަށާއި ރައްޔިތުންނަށް ފޮރުވާނެ އެއްޗެއް އާ ސަރުކާރުގައި ނޯންނާނެ ކަމަށް ވެސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
