ކިއުއެސް ވޯލްޑް ޔުނިވާސިޓީ ރޭންކިންގްއިން ވިލާ ކޮލެޖަށް ހަތަރު ތަރީގެ ރޭންކިންއެއް ލިބިއްޖެ އެވެ.
ވިލާ ކޮލެޖަށް ހަތަރު ތަރި ލިބުނީ ޖުމުލަ 60 ގައުމެއްގެ 600 ޔުނިވާސިޓީއެއްގެ ތެރެއިން އަށް ކެޓަގަރީއަކުން ހޮވިގެންނެވެ. މުޅި ޖުމްލަ ހަތަރު ތަރީގެ އިތުރުން އެ ކޮލެޖަށް ވަނީ ކިއުއެސް ސްޓާސްގެ ތިން ދާއިރާއަކުން ފަސް ތަރި އަދި ދެ ދާއިރާއަކުން ހަތަރު ތަރި ލިބިފަ އެވެ. އޭގެ ތެރޭއިން ފަސް ތަރި ލިބުނީ އޮންލައިން ލާނިން، އެންވަރަމެންޓަލް އިމްޕެކްޓް އަދި އެމްޕްލޯޔަބިލިޓީންނެވެ. ހަތަރު ތަރި ލިބިފއިވާ ދާއިރާ ތަކުގެ ތެރޭގައި ޓީޗިން އެންޑް ލާނިން އަދި އެކަޑަމިކް ޑިވެލޮޕްމެންޓް ހިމެނެއެވެ.
މިއަދު ވިލާ ކޮލެޖުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ކޮލެޖުގެ ވައިސް ރެކްޓާ ޑރ. އަލީ ނަޖީބް ވިދާޅުވީ، ކިއުއެސް ސްޓާގައި އެ ކޮލެޖުން ބައިވެރިވީ، ވިލާ ކޮލެޖުގެ ކޮލެޓީ ރަނގަޅު ކުރުމުގެ ގޮތުން ކުރެވެމުންދާ މަސައްކަތްތަކުގެ ތެރެއިން ކަމަށެވެ.
އަދި މިއީ ވިލާ ކޮލެޖަށް ލިބުނު ބޮޑު ކާމިޔާބީއެއް ކަމުގައި ފާހަގަ ކުރައްވައި މިއީ ރާއްޖޭގެ މަތީ ތައުލީމު ހާސިލްކުރާ އިންސްޓިޓިއުޓްއަކަށް މިފަދަ ބައިނައްލަގުވާމީ ރޭންކިން އެއް ލިބުނު ފުރަތަމަ ފަހަރުކަމަށް ޑރ. އަލީ ވިދާޅުވިއެވެ.
މި ކާމިޔާބީއަކީ ވިލާ ކޮލެޖުން ތައުލީމު ހާސިލް ކުރާ އަދި އަލަށް ކޮލެޖާއި ގުޅޭ ދަރިވަރުންނަށް ލިބިގެން ދާނެ ވަރަށް ބޮޑު ހިތްހަމޖެހުމެއްގެ ގޮތުގައި ވައިސް ރެކްޓާ ފާހަގަކުރެއްވި އެވެ. އެގޮތުން އޮންލައިންކޮށް ކޯސްތައް ފުރިހަމަކުރާ ދަރިވަރުންނަށް ވިލާ ކޮލެޖުން ލިބިގެންދަނީ ދުނިޔޭގެ ފެންވަރުގައި ފާހަގަކޮށްލެވޭ މަތީ ފެންވަރުގެ ތައުލީމު ކަމުގައި ޑރ. އަލީ ވިދާޅުވި އެވެ.
ކިއުއެސް ސްޓާ ރޭންކިން ސިސްޓަމަކީ ދުނިޔޭގެ އެންމެ މަތީ ފެންވަރުގައި ޔުނިވާސިޓީތަކާއި ހަޔާ އެޑިއުކޭޝަން އިންސްޓިޓިއުޓްތައް ރޭންކް ކުރާ ސިސްޓަމެކެވެ. މި ސިސްޓަމުން ހަތަރު ތަރި ލިބެނީ އިންޓާނޭޝަނަލް ފެންވަރުގައި ތައުލީމު ހާސިލުކުރުމުގެ ފުރުސަތު ހޯދައިދޭ އަދި މަތީ ފެންވަރުގައި ކިޔެވުމުގެ އެންމެހާ ހިދުމަތްތައް ފޯރުކޮށްދޭ އިންސްޓިޓިއުޓް ތަކަށެވެ.
Advertisement
This content is created and paid for by advertisers and does not involve Voice Journalists
