އައިޖީއެމްއެޗްގައި ވަޒީފާ އަދާކުރަމުން ދިޔަ ފިލިޕީންސްގެ ނަރުސް މޭރީ ގްރޭސް މަރާލި މައްސަލާގައި ދައުވާކުރާ ހަލީމަތު ލަމްހާގެ ފައިގައި ޓެގު އެޅުވުމަށް ފަހު އޭނާ ދޫކޮށްލަން ލަމްހާގެ ވަކީލުން އެދިއްޖެ އެވެ.

ޖިނާއީ އިޖުރާއަތުގެ ގާނޫނުގައި އޮންނަ ގޮތުގެ މަތީން، ބަންދު މުރާޖައާ ކޮށްދިނުމަށް ލަމްހާގެ ފަރާތުން ވަނީ ހުށަހަޅައިފަ އެވެ. މީގެ ކުރިން ވެސް ޝަރުތުތަކެއް ކުރުމަށް ފަހު ލަމްހާ ދޫކޮށްލަން އެދުމުން، ޝަރީއަތުން ނިންމާފައިވަނީ ލަމްހާގެ ބަންދު ދެމެހެއްޓުމަށެވެ.

ބަންދާ މެދު އެންމެ ފަހުން ގޮތެއް ނިންމިތާ ފަސް މަސް ދުވަސް ފަހުން ބަންދު މުރާޖައާ ކުރުމަށް ހުށަހަޅާފައި އޮތުމުން، އެ ކަމާ ގުޅޭ ގޮތުން ވާހަކަ ދައްކަން ދިން ފުރުސަތުގައި ލަމްހާގެ ވަކީލު އަހުމަދު ޔާމީން އެދިވަޑައިގަތީ ޓެގު އެޅުމަށް ފަހު އޭނާ ދޫކޮށްލުމަށެވެ.

ލަމްހާއަކީ ކުށުގެ ރެކޯޑެއް މީގެ ކުރިން އޮތް މީހަކަށް ނުވެފައި، އެހެން ނަމަވެސް މީހަކު މަރާލުމުގައި ބައިވެރިވުމުގެ ތުހުމަތު އޮތް މީހަކަށް ވާތީވެ، މުޖުތަމައަށް ނުރައްކާ އޮތް ކަމަށް ބެލެވޭނަމަ، ޓެގު އަޅުވާފައި އޭނާ ހުންނަ ތަން ބެލޭނެ ގޮތަށް ދޫކޮށްލެވެން ވާނެ ކަމަށް ދިފާއީ ވަކީލު ވިދާޅުވި އެވެ.

ބަންދާ މެދު ގާޒީ މިއަދު ގޮތެއް ނުނިންމަވަ އެވެ. ދެން އަންނަ އަޑުއެހުމެއްގެ ކުރިއަށް، ގޮތެއް ނިންމަވާނެ ކަމަށް މައްސަލަ ބައްލަވާ ގާޒީ ހުސައިން ފާއިޒު ރަޝާދު ވިދާޅުވި އެވެ.

އޮކްޓޯބަރު 19, 2021 ގައި ގްރޭސް ދަންޖެހިގެން މަރުވި ކަމަށް ބުނެ މާވިން ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު އިތުރަށް ހިންގަމުން ދިޔައީ އެވެ.

މޭރީ މަރުވީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން ކަމަށް އޮޓޮޕްސީ ރިޕޯޓުން ދައްކަ އެވެ. ފުލުހުންގެ ތަހުގީގު ނިންމުމަށް ފަހު އޭނާ މަރާލުމުގެ ދައުވާ އުފުލީ ފިރިމީހާ މާވިން އެސްވައި ވާގަސްގެ މައްޗަށެވެ. މަރާލުމުގައި ބައިވެރިވުމުގެ ދައުވާ އުފުލާފައިވާ ލަމްހާއަކީ މާވިންގެ ލޯބިވެރިޔާ އެވެ.

އަދި ގްރޭސް މަރާލި ކަމުގެ ތުހުމަތުގައި މާވިން ހައްޔަރު ކުރީ އެ އަހަރުގެ އޮކްޓޯބަރު 27 ގަ އެވެ. ލަމްހާ ހައްޔަރު ކުރީ އޭގެ 50 ދުވަސް ފަހުން އެ އަހަރުގެ ޑިސެމްބަރު 16 ގަ އެވެ.