އަލިފުށީ ދާއިރާގެ މެންބަރު މުހައްމަދު ރަޝީދު ހުސެން (ބިގޭ) ރައްޔިތުންގެ މަޖިލީހުގެ ތެރޭގައި އެ މަޖިލީހުގެ ކުރީގެ ރައީސް މުހައްމަދު ނަޝީދަށް އައުގުރާނަ ގޮވާ ވީޑިއޯއެއް އާންމުވެއްޖެއެވެ.
މިއަދުގެ މަޖިލީހުގެ ޖަލްސާ ހޫނުވެ ފައިވާ ދަނޑިވަޅެއްގައި، ބިގޭ ރައީސް ނަޝީދާއި ދިމާއަށް އައުގުރާނަ ގޮވާ ވީޑިއޯ އާއްމު ކުރައްވާފައިވަނީ ދަ ޑިމޮކްރެޓްސް ގެ މެންބަރު ހުސައިން ފިރުޝާން އެވެ.
ފިރުޝާން އާއްމު ކުރި އެ ވީޑިއޯ އާއެކު ބިގޭއަށް ވަނީ ގިނަބައެއްގެ ފާޑުކިއުންތައް އަމާޒުވެފައެވެ.
މިއަދު މަޖިލީސް ހޫނުވެގެން ދިޔައީ، ފިނޭންސް މިނިސްޓަރު އިބްރާހިމް އަމީރު ބަޖެޓް ހުށަހެޅުމަށް ވަޑައިގަތުމުން، އަމީރު ވަނީ ގާނޫނާ ހިލާފުވެފައިކަމަށް ބުނެ ޑިމޮކްރެޓްސް ގެ މެންބަރުން އަޑު ގަދަ ކުރަން ފެށުމާއި ގުޅިގެންނެވެ.
ޑިމޮކްރެޓްސްގެ މެންބަރުން އަމީރަށް ބަޖެޓް ހުށަހެޅުމަށް ހުރަސް އަޅަމުންދިޔައިރު އެމްޑީޕީ މެންބަރުން ތިއްބެވީ އަމީރު ހުންނެވި މޭޒު ކޮޅުކައިރީ ޑިމޮކްރެޓްސް މެންބަރުން އެތަނަށް ކައިރިވިޔަ ނުދިނުމަށް މަސައްކަތް ކުރެއްވުމަށެވެ. އެފަދަ ގޮތުގައި އަމީރު ބަޖެޓް ހުށަހެޅުއްވާ ނިންމަވާ ލެއްވުމުން އެ ބަޖެޓު ވަނީ ދިރާސާކުރަން ކޮމެޓީއަށް ވެސް ފޮނުވައިފައެވެ.
ޑިމޮކްރެޓްސްގެ ފަރާތުން ކަންބޮޑުވުން ފާޅުކުރަމުން އަންނަނީ މާލިއްޔަތު ގާނޫނުގައި ބުނާ މުއްދަތުގައި ފިނޭސް މިނިސްޓަރު އަންނަ 2024 ވަނަ އަހަރަށް ލަފާކުރާ ބަޖެޓު ހުށަހަޅާފައިނުވާތީއެވެ.
ރައީސް ނަޝީދު ވެސް މި މައްސަލައިގައި މިއަދު ވިދާޅުވެފައިވަނީ ފިނޭންސް މިނިސްޓަރު ކޯޓަށް ގެންދަންޖެހޭކަމަށާއި, މަޖިލީހުގެ އިމްތިޔާޒަށް ފިނޭންސް މިނިސްޓަރު އަރާފައިވާކަމަށެވެ.
Advertisement
This content is created and paid for by advertisers and does not involve Voice Journalists
