ފެނަކައިގެ މުވައްޒަފެއް ބަލިވެއިނުމުން ވަޒީފާއަށް ނުނިކުތުމުން ވަޒީފާއިން ވަކިކުރީ ގޯސްކޮށް ކަމަށް ވަޒީފާއާއި ބެހޭ ޓްރިބިޔުނަލް އިން ނިންމައިފިއެވެ.

ބަލިވެއިނދެ ވަޒީފާއަށް ނުނިކުތުމުން ވަޒީފާއިން ވަކިކޮށްފައިވަނީ ފެނަކައިގެ ލީގަލް އެފެއާޒް ޑިޕާޓްމަންޓްގެ އެޑްމިނިސްޓްރޭޝަން ޔުނިޓުގައި މަސައްކަތް ކުރަމުންދިޔަ މުވައްޒަފަކެވެ.

މައްސަލައިގެ ހުލާސާ ރިޕޯޓުގައި ބުނެފައިވަނީ މާޗު 1، 2016 އިން ފެށިގެން އެ މުވައްޒަފު ފެނަކަ ކޯޕަރޭޝަންގެ ލީގަލް އެފެއާޒް ޑިޕާޓްމަންޓްގެ އެޑްމިނިސްޓްރޭޝަން ޔުނިޓުގެ ސީނިއާ އޮފިސަރެއްގެ މަގާމުގައި ވަޒީފާ އަދާކުރަމުން ދަނިކޮށް އޭނާ ބަލިވެއިނުމާ ގުޅިގެން ޑޮކްޓަރަށް ދެއްކުމުން ވިހެއުމާ ހަމައަށް "ބެޑްރެސްޓް" ކުރުމަށް އެންގި ކަމަށެވެ.

އެގޮތަށް ޑޮކްޓަރު އެންގުމުން އެކަން އޭނާގެ ފަރާތުން ފެނަނަކައިގެ އެޗްއާރަށާއި، ޑިޕާޓްމަންޓާ ހަވާލުވެހުރި ވެރިޔާއަށް އީމެއިލް މެދުވެރިކޮށް އެންގުމުން ޑޮކްޓަރު ދޫކޮށްފައިވާ ލިޔުމަށް ރިއާޔަތްކޮށް އޭނާއަށް ޕްރީ މެޓާނިޓީ ޗުއްޓީއެއް ހަމަޖައްސައިދިން ކަމަށްވެސް އެ ރިޕޯޓުގައި ބުނެފައިވެއެވެ.

އޭނާ ޕްރީ މެޓާނިޓީ ޗުއްޓީގައި ހުއްޓައި، ފެނަކައިން ގުޅައި، އޭނާއަށް ހަމަޖައްސައިދިން 30 ދުވަހުގެ ޕްރީ މެޓާނިޓީ ޗުއްޓީ ހަމަވެފައިވާ ކަމަށް އެންގި އެވެ.

އެހެންނަމަވެސް ސިއްހީ ހާލަތު ހުރިގޮތުން ވަޒީފާއަށް ނުކުމެވެން ނެތުމުން އޭނާގެ އިތުރު ޗުއްޓީތައް ހުރުމާއެކު، ވަޒީފާއަށް ހާޒިރުނުވެވޭ ދުވަސްތައް ބާކީ ހުރި ޗުއްޓީ ދުވަސްތަކުން ހަމަޖައްސައިދިނުމަށް އޭނާ ފެނަކައިގެ އެދުނެވެ.

އެކަމަކު ފެނެކައިގެ މުވައްޒަފުންގެ ޤަވާއިދުގައިވާ ގޮތުގެ މަތިން އޭނާ އޮފީހަށް އެންގުމަކާ ނުލައި، އަދި މަގުބޫލު އުޒުރެއްނެތި ވަޒީފާއަށް ހާޒިރުނުވާތާ ފަސް ދުވަހަށްވުރެ ގިނަ ދުވަސްވެފައިވާ ކަމަށް ބުނެ، މެއި 31، 2022 ގައި އޭނާ ފެނަކައިގެ ވަޒީފާއިން ވަކިކުރި އެވެ.

އެހެންވެ، އޭނާގެ ފަރާތުން މިދިޔަ އަހަރު ޓްރައިބިއުނަލަށް މައްސަލަ ހުށަހެޅީ، ވަޒީފާ އަނބުރާ ރުޖޫއަކޮށްދިނުމަށާއި، ވަޒީފާއިން ވަކިކުރި ތާރީހުން ފެށިގެން ލިބެންޖެހޭ މުސާރައާއި އިނާޔަތްތައް ނަގައިދިނުމަށާއި، ވިހެއުމާ ގުޅިގެން ލިބެންޖެހޭ ހަ މަސްދުވަހުގެ ޗުއްޓި ލިބިދިނުމަށް އެދި އެވެ.

ނަމަވެސް ފެނަކަ ކޯޕަރޭޝަނުން ވަނީ އެ މައްސަލައަށް އިންކާރުކޮށްފަ އެވެ. ފެނަކައިން ބުނެފައިވަނީނޯޓިސް ދިނުމެއްނެތި އޭނާ ވަޒީފާއިން ވަކިކުރީ އެ ކުންފުނީގެ މުވައްޒަފުންގެ ޤަވާއިދުގައިވާ ގޮތަށް އެންގުމަކާ ނުލައި އަދި މަޖުބޫރު އުޒުރެއްނެތި ވަޒީފާއަށް ހާޒިނުވާތީ ކަމަށެވެ.

އެ މައްސަލައިގައި ޝަރީޢަތުގައި ދެފަރާތުން ދެއްކި ވާހަކަތަކާއި ހެއްކަށް ބަލައި ޓްރައިބިއުނަލުން ނިންމީ އޭނާ ވަޒީފާއިން ވަކިކުރުމުގައި ޤާއިމުކުރަންޖެހޭ މައުޟޫއީ އަދި އިޖުރާއީ އަދުލުވެރިކަން ޤާއިމުކޮށްފައިނުވާ ކަމަށެވެ.

އަދި އޭނާ ވަޒީފާއިން ވަކިކުރުމަކީ އެކަށީގެންވާ ސަބަބެއް ނެތް، ވަޒީފާއާބެހޭ ޤާނޫނުގައި ކަނޑައަޅާފައިވާ ހަމަތަކާ ހިލާފު, އަންފެއާ ޑިސްމިސަލްއެއް ކަމަށް ކަނޑައަޅައި، ޓްރައިބިއުނަލުން ވަނީ އޭނާގެ ވަޒީފާ އަނބުރާ ރުޖޫއަކުރުމަށް ފެނަކައިގެ މައްޗަށް އަމުރުކޮށްފަ އެވެ.

އެއާއެކު އޭނާ ވަޒީފާއިން ވަކިކުރި ތާރީހުން ފެށިގެން، ވަޒީފާގެ ކަންކަން އަލުން ހަމަޖެހޭ ތާރީހާ ހަމައަށް އޭނާ އަދާކުރި މަޤާމުގެ މުސާރައާއި އިނާޔަތްތަކަށްވާ ފައިސާ ފެނަކައިން ދޭންޖެހޭނެ ކަމަށް ޓްރައިބިއުނަލްގެ ނިންމުމުގައިވެ އެވެ. އެކަންކަން ތަންފީޒު ކުރުމަށް ފެނަކައަށް ދީފައިވަނީ 30 ދުވަހުގެ މުއްދަތެކެވެ.