އެމްޖީ ސްޕޯޓްސް ކްލަބާއި ފިއޮންޓީ ސްޕޯޓްސް އެކެޑަމީ ގުޅިގެން ކ. ކާށިދޫގައި ފެށުމުން ހަމަޖެހިފައިވަނީ ފުޓްބޯޅަ އެކަޑަމީ 2024 ވަނަ އަހަރުގެ ޖެނުއަރީ މަހުގެ ފުރަތަމަ ހަފްތާ ތެރޭގައި ފެށުމަށް ހަމަޖެހިފައިވާ ކަމަށް އެކުލަބުން ބުނެފިއެވެ.

ވޮއިސް އަށް މައުލޫމާތު ދެއްވަމުން އެމްޖީ ސްޕޯޓްސް ކްލަބުގެ މީޑިއާ ކޯޑިނޭޓަރު އިބްރާހިމް ޝާބިލް ވިދާޅުވީ ކުރިއަށް އޮތް ޖެނުއަރީ މަހުގެ 6 ވަނަ ދުވަހު އެކަޑަމީގެ ހަރަކާތްތައް ރަސްމީކޮށް ފެށުމަށް މިހާރު ތާވަލުކުރެވިފައިވާ ކަމަށެވެ. އެގޮތުން ފުރަތަމަ ފަށަނީ 101 ކުދިންނާއެކުގައި ކަމަށާ، އޭގެ ތެރޭގައި ހިމެނެނީ 86 ފިރިހެން ކުދިންނާއި 15 އަންހެން ކުދިން ކަމަށް އޭނާ ވިދާޅުވި އެވެ. އަދި ރަޖިސްޓްރޭޝަން ފިއެއްގެ ގޮތުގައި ކޮންމެ ކުއްޖެއްގެ އަތުން 350 ރުފިޔާ ނެގުމަށް ހަމަޖެހިފައިވާއިރު މަހު ފީގެ ގޮތުގައި ނެގުމަށް ހަމަޖެހިފައިވަނީ 250 ރުފިޔާ ކަމަށްވެސް ވިދާޅުވި އެވެ. 

"ފުރަތަމަ އަޅުގަނޑުމެން ބައިވެރިވުމުގެ ފުރުސަތު ހުޅުވާލީ ނޮވެމްބަރު 10 އަކާއި ހަމައަށް، އެމުއްދަތުގެ ތެރޭގައި ރަޖިސްޓަރީ ކޮށްފައިވާ ކުދިންނާއެކު ފެށުމަށް މަސައްކަތް މިކުރަނީ. ނަމަވެސް އެކަޑަމީގެ މަސައްކަތްތައް ފެށި ހަމަޔަކަށް އެޅުވުމުން އަނެއްކާވެސް އައު ކުދިންނަށް ބައިވެރިވުމުގެ ފުރުސަތު ހުޅުވާލާނަން." ޝާބިލް ވިދާޅުވިއެވެ.

އިތުރަށް ވާހަކަ ދައްކަމުން ޝާބިލް ވިދާޅުވީ ފިއޮންޓީ ސްޕޯޓްސް އެކެޑަމީ އާއި ގުޅިގެން އެކުލަބުން މިފަށާ ފުޓްބޯޅަ އެކަޑަމީގައި ތަޖުރިބާ ލިބިފައިވާ ފަސް ކޯޗުން މަސައްކަތް ކުރާނެ ކަމަށާއި، އެކަޑަމީގެ ތަމްރީނުތައް ރާވައި ކުރިއަށް ގެންދާނީ ތަޖްރީބާ ކޯޗު މުހައްމަދު ނިޒާމް (ނިޒާމްބެ) ގެ ސީދާ ބެލުމުގެ ދަށުންކަމުގައެވެ. އެކަމަށްޓަކައި އެކުލަބުން ވަނީ ނިޒާމްބެގެ ފިއޮންޓީ ސްޕޯޓްސް އެކެޑަމީ އާއި އެކު އެއްބަސްވުމެއްގައި ސޮއިކޮށްފައެވެ. 

އެމްޖީ ސްޕޯޓްސް އެކެޑަމީގެ ފަރާތުން އެ އެއްބަސްވުމުގައި ސޮއިކުރެއްވީ އެމްޖީ ސްޕޯޓްސް ކްލަބުގެ ރައީސް އަލީ ޒިދާނެވެ. އަދި ފިއޮންޓީ ސްޕޯޓްސް އެކެޑަމީގެ ފަރާތުން ސޮއިކުރެއްވީ އެ އެކެޑަމީގެ ޑިރެކްޓަރު އަދި ރާއްޖޭގެ ތަޖުރިބާކާރު ކޯޗު މުހައްމަދު ނިޒާމް (ނިޒާމްބެ) އެވެ. އަދި އެ އެއްބަސްވުމުގެ ދަށުން އެމްޖީ ސްޕޯޓްސް އެކެޑަމީ ހިންގުމުގައި ކޯޗު ނިޒާމްބެގެ އެހީތެރިކަމާއި ބައިވެރިވުން ލިބޭނެ ކަމަށް އެ ކްލަބުން މައުލޫމާތުދެއެވެ.

ޝާބިލް ވިދާޅުވީ މި އެކަޑަމީގެ ސަބަބުން ކާށިދޫގެ ފުޓުބޯޅައަށާއި އަދި ކުރިއަރަމުން އަންނަ ޒުވާން ކުޅުންތެރިންނާއި ފުޓުބޯޅަ ކުޅެން ބޭނުންވާ ކުދިންނަށް ކުރިމަގުގައި އެކުޅުންތެރިންގެ ހުނަރު ދައްކާލުމަށް އިތުރު ފުރުސަތުތަކެއްލިބިގެން ދާނެކަމަށް ގަބޫލު ކުރެވޭ ކަމަށެވެ. އަދި އުންމީދަކި އެ އެކަޑެމީގެ ތެރެއިން ތަމްރީނުވާ އެ ރަށުގެ ޒުވާނުން ރާއްޖޭގެ ގައުމީ ލީގުންނާއި އެކި އުމުރުފުރާތަކުގެ ޤައުމީ ޓީމުތަކުން ފުރުސަތު ލިބިގެންދިޔުން ކަމަށެވެ. 

ޝާބިލް އިތުރަށް ވިދާޅުވީ މިފަދަ ބޮޑު ޕްރޮޖެކްޓެއް ފެށިގެން މިދަނީ ވަރަށް ގިނަ ބައެއްގެ އެހީތެރިކަމާއި އެއްބާރުލުން ލިބިގެންކަމަށެވެ. އޭގެތެރޭގައި ވަކިން ޙާއްސަކޮށް ކާށިދޫ ސްކޫލާއި ރަށު ކައުންސިލްގެ ފަރާތުން ލިބޭ އެއްބާރުލުމާއި އެހީތެރިކަން ފާހަގަކޮށް އޭނާ ވަނީ އެފަރާތްތަކަށް ޝުކުރު އަދާކޮށްފައެވެ. އަދި ރަށުގެ ކުލަބް ޖަމްއިއްޔާ ތަކުން ވެސް އެހީތެރިކަން ލިބޭ ކަމަށާއި މިކަމުގައި އެމްޖީ ސްޕޯޓްސް ކްލަބާއި ބައިވެރިވުމަށް ބޭނުންވާ ހުރިހާ ފަރާތްތަކަށް އެ ފުރުސަތު ހުޅުވިފައި އޮތް ކަމަށް ޝާބިލް ވިދާޅުވި އެވެ.