އެފްކޮންސް އިން ދައްކަންޖެހޭ 69 މިލިއަން ރުފިޔާގެ ޖޫރިމަނާ މައާފުނުކުރުމަށް އެންވަޔަރަންމަންޓް މިނިސްޓްރީން ނިންމައިފިއެވެ.
މިދިޔަ އަހަރުގެ އޯގަސްޓް މަހުގެ 16 ވަނަ ދުވަހު ތިލަ މާލެ ބްރިޖްގެ މަސައްކަތުގައި ހަރަކާތްތެރިވި އެފްކޮންސް ކުންފުނީގެ ބާޖެއް ވިލިމާލެ ފަރަށް އަރައި އެފަރަށް ލިބުނު ގެއްލުމުގެ ބަދަލުގައި އެ އެންވަޔަރމަންޓް މިނިސްޓްރީން ވަނީ އެފްކޮނަސް ކުންފުނި 69 މިލިޔަން ރުފިޔާއިން ޖޫރިމަނާކޮށްފައެވެ.
އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އިން ވިލިމާލެ ފަރު ބަލައި ސާވޭކުރުމަށްފަހު އެފްކޮންސް ކުންފުނި ޖޫރިމަނާކުރީ މިދިޔަ އަހަރުގެ ނޮވެމްބަރު 13 ވަނަ ދުވަހު އެވެ. އެފްކޮންސް އިން މިމައްސަލަ އެންވަޔަރަންމަންޓް މިނިސްޓަރު އައިމިނަތު ޝައުނާއަށް ހުށަހަޅައި އިސްތިއުނާފް ކުރީ މިދިޔަ އަހަރުގެ ޑިސެމްބަރު ހަތްވަނަ ދުވަހު އެެވެ.
އެންވަޔަރަންމަންޓް މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ ޖޫރިމަނާގެ މައްސަލަ އެފްކޮންސް އިން އިސްތިއުނާފް ކުރި ނަމަވެސް ޖޫރިމަނާ އަށް ބަދަލެއް ގެންނަން ޖެހޭ ސަބަބެއް ނެތް ކަމަށެވެ. މިނިސްޓްރީން މިގޮތަށް ނިންމީ ޖޫރިމަނާ އިސްތިއުނާފް ކުރަން ހުށަހެޅުމުން އެ މައްސަލަ އިތުރަށް ބަލައި ދިރާސާކުރުމަށްފަހު އެވެ.
"އިސްވެ ދެންނެވުނު ގޮތަށް މި މައްސަލަ މިނިސްޓްރީން ބެލުމުން ފާހަގަކުރެވުނު ގޮތުގައި، ނަގަން ޖެހޭ ކޮންޓްރޯލް މެޝާތަކާ އެކު އުޅަނދު ފަރަށް އެރި ހާދިސާ އިން ރައްކާތެރިވުމުގެ ފުރުސަތު މަސައްކަތުގެ ކޮންޓްރެކްޓަރަށް އޮތެވެ. އެހެންކަމުން، މި މައްސަލާގައި އީޕީއޭ އިން ކަނޑައަޅާފައިވާ ޖޫރިމަނާ މުރާޖައާކޮށް ބަދަލެއް ގެންނަން ޖެހޭ ސަބަބެއް ނެތް ކަން ފާހަގަވެފައިވެ އެވެ،"
ބަޔާނުގައިވެ އެވެ.
ބަޔާނުގައި އިތުރަށް ބުނެފައިވަނީ ޖޫރިމަނާ ފައިސާގެ ތެރެއިން 15 މިލިއަން ރުފިޔާ ޖަމާކުރާނީ "އެންވަޔަރަންމަންޓަލް ރެސްޓްރޯޝަން ފަންޑް" އަށް ކަމަށެވެ.
މިނިސްޓްރީން މިކަން ހާމަކޮށްފައި މިވަނީ އެފްކޮންސްގެ ޖޫރިމަނާގެ މައްސަލަ އެ މިނިސްޓްރީގައި އިސްތިއުނާފް ކޮށްފައި އޮންނަތާ ގާތްގަނޑަކަށް އަހަރެއް ފަހުންނެވެ.
Advertisement
This content is created and paid for by advertisers and does not involve Voice Journalists
