ފަލަސްޠީނުގެ ޣައްޒާގައި ހުންނަ އެންމެ ބޮޑު ހޮސްޕިޓަލް ކަމަށްވާ އަލް ޝިފާ މެޑިކަލް ކޮމްޕްލެކްސް އަށް އިޒްރާއިލް ސިފައިން ވަދެ ގަނެ ބަލާފާސްކުރުމުގެ ނަމުގައި އެހޮސްޕިޓަލުގެ އެތެރޭގައި ތިބި މީހުން ބަރަހަނާކޮށް ކަނުބަދެ ސުވާލުކުރަމުން އެބަދެއެވެ.

އަލް ޖަޒީރާގައި އަލް ޝިފާ ހޮސްޕިޓަލް ތެރޭގައި ހުރި މީހަކާއި ހަވާލާދީ ބުނެފައިވަނީ އަލް ޝިފާގެ ތެރެއިން 30 މީހަކު ބޭރަށް ނެރެ، އެމީހުން ބަރަހަނާ ކޮށްފައިވާ ކަމަށެވެ.

އަދި އެމީހުން ކަނުބަނދެ ކޯޓްޔާޑް ތެރެއަށް ގެންގޮސްފައިވާ ކަމަށެވެ. ކޯޓްޔާޑް ތެރޭގައި ތިން ޓޭންކް އޮތް ކަމަށެވެ. އަދި އޭގެން އެއް ޓޭންކް އޮތީ އެހޮސްޕިޓަލްގެ އެމެޖެންސީ ޑިޕާޓްމެންޓް ކުރިމަތީގައި ކަމަށެވެ. އެ ޓޭންކު ހޮސްޕިޓަލްގެ ތެރޭގައި ހަރަކާތްތެރިވާ ކޮންމެ އެއްޗަކަށް އަމާޒު ކުރަމުންދާ ކަމަށް އަލްޖަޒީރާގައި ބުނެފައިވެއެވެ.

އަލް ޝިފާގެ އެމަޖެންސީ ވާޑްގެ ސްޓާފަކާއި ހަވާލާދީ އަލްޖަޒީރާގައި ބުނެފައިވަނީ އިޒްރާއިލް ސިފައިން އަލް ޝިފާގައި ބޯހިޔާވަހިކަން ހޯދަމުންދާ ފިރިހެނުން ތަކެއް އެމީހުންގެ ބެލުމުގެ ދަށަށް ވަރަށް ބޮޑަށް އަނިޔާކޮށްފައިވާ ކަމަށެވެ.

“180 އަށްވުރެ ގިނަ ޝަހީދުންގެ ހަށިގަނޑު ހޮސްޕިޓަލްގެ ގޯތިތެރޭގައި އެބައޮތް، ދުވަހެއް ދުވަހަކަށް އެހަށިތަކުގެ ޙާލަތު އެެދަނީ ގޯހުން ގޯހަށް، މިތަނުގެ ޙާލަތު ވަރަށްގޯސް، ވަރަށް ބިރުވެރި، ހޮސްޕިޓަލްގެ އެތަން މިތަނުން ބަޑިޖަހާ އަޑުފައްގަނޑު ދަނީ އިވެމުން” އަލްޖަޒީރާ އާއި ވާހަކަ ދެއްކި ޢޮމަރް ޒާޤޫޠް ބުނެފައިވެއެވެ.

އަލް ޝިފާ އަކީ މިވަގުތު ގިނަ ބަޔަކު ރައްކާތެރިކަން ހޯދަމުން ދާ ތަނެކެވެ. އަލް ޝިފާގެ މެޑިކަލް ސްޓާފުންނާއި ހަވާލާދީ އަލްޖަޒީރާގައި ބުނެފައިވަނީ އަލް ޝިފާގައި 650 ބަލިމީހުން އެބަތިބި ކަމަށާއި، 5000 އާއި 7000 އާއި ދެމެދަކަށް ގެދޮރު ގެއްލިފައިވާ މީހުން އަލް ޝިފާ ކޮމްޕްލެކްސް ގައި އެބަތިބިކަމަށެވެ.