ގެދޮރުވެރިޔާ ސްކީމް ގެ ދަށުން ސަރުކާރުން ދޫކޮށްފައިވާ 4000 ފްލެޓް ގެ ކުލީގެ އަގުތައް ހައުސިން މިނިސްޓްރީން އާންމު ކޮށްފިއެވެ.

ގެދޮރުވެރިޔާ ސްކީމަށް ފޯމު ހުށަހަޅާފައިވާ ފަރާތްތަކުގެ ދާއިމީ ލިސްޓަށް ޝަކުވާހުށަހެޅުމަށް ހުޅުވާލި ފުރުސަތުގައި ހުށަހަޅާފައިވާ ޝަކުވާގެ މައްޗަށް ރިޔާއަތްކޮށް ބެލުމަށްފަހު ގެދޮރުވެރިޔާ ސްކީމުގެ ދާއިމީ ލިސްޓް މިއަދު ޕްލޭނިންގ މިނިސްޓްރީން ވަނީ އިއުލާން ކޮށްފައެވެ. 

އެ އިއުލާނާއެކު މިނިސްޓްރީން ވަނީ ފްލެޓު ދޫކުރަން ނިންމާފައިވާ އަގުތައްވެސް ހާމަކޮށްފައެވެ. 

އެގޮތުން، އެ ސްކީމްގެ ދަށުން ދޫކުރެވޭ 3 ކޮޓަރީގެ ފުލެޓްގެ މަހު ކުއްޔަކީ 7000 ރުފިޔާ އާއި މަރާމާތު ފީގެ ގޮތުގައި މަހަކު 1000ރ ކަމަށާއި 2 ކޮޓަރީގެ މަހު ކުއްޔަކީ 5000 ރުފިޔާ އާއި މަރާމާތު ފީގެ ގޮތުގައި މަހަކު 1000 ރުފިޔާ ކަމަށް އިއުލާންގައި ވެއެވެ. އެހެންކަމުން ތިން ކޮޓަރީގެ ފުލެޓަކަށް ޖުމުލަ 8000ރ ދައްކަންޖެހޭއިރު ދެ ކޮޓަރީގެ ފުލެޓަކަށް ދައްކަންޖެހެނީ 6000 ރުފިޔާއެވެ. 

ކުލި ދެއްކުމަށް ފެށުމަށް ހަމަޖެހިފައިވަނީ ފުލެޓް ޙަވާލުކުރާ ތާރީހުންފެށިގެން 3 މަސް ދުވަހުގެ ގްރޭސް ޕީރިއަޑް އަކަށްފަހުގައި ކަަމށް ވެސް މިނިސްޓްރީގެ އިއުލާން ގައި ވެއެވެ. އަދި ކުލި ދައްކަންޖެހޭ ޖުމްލަ މަހުގެ އަދަދަކީ 300 މަސް ކަމަށްވެސް މިނިސްޓްރީން ބުންޏެވެ.