އެމްއެމްޕީއާރުސީ ގެ ޚިޔާނާތުގައި ދައުވާ އުފުލާފައިވާ ކުރީގެ ނައިބު ރައީސް އަހުމަދު އަދީބަށާއި އެ ކުންފުނީގެ ކުރީގެ މެނޭޖިން ޑިރެކްޓަރު ޒިޔަތަށް ރައީސުލް ޖުމްހޫރިއްޔާ މާފު ދެއްވުމުން  ދިވެހި ރާއްޖޭގެ ހިއުމަން ރައިޓްސް ކޮމިޝަން (އެޗްއާރުސީ) އިން ކަންބޮޑުވުން ފާޅުކޮށްފިއެވެ.

މިކަމާއި ގުޅިގެން އެޗްއާރުސީން ނެރުނު ނޫސް ބަޔާނެއްގައި ވަނީ އެމްއެމްޕީއާރުސީ ބޮޑު ޚިޔާނާތުގެ މައްސަލައިގައި ކުށް ސާބިތުވެ، ޙުކުމް ތަންފީޒު ކުރަމުންދިޔަ އަޙްމަދު އަދީބު ޢަބްދުލްޣަފޫރު އާއި ޒިޔާތަށް މަޢާފުދިނުމާއި އަދަބު ލުއިކޮށްދިނުމުގެ ޤާނޫނު ގެ ދަށުންް ރައީސުލްޖުމްހޫރިއްޔާ އެ ފަރާތްތަކުގެ ކުށުގެ އަދަބު ލުއިކޮށްދެއްވުމުގެ ސަބަބުން، 2023 ނޮވެންބަރު 13 ވަނަ ދުވަހު އެ ފަރާތްތައް ބަންދުން މިނިވަންވެފައިވުމަކީ އެ ކޮމިޝަނުން ނުހަނު ކަންބޮޑުވާކަމެއްކަމުގައި އެވެ.

އޭގެ އިތުރުންވެސް އެޗްއާރުސީން ބުނެފައި ވަނީ ދިވެހިރާއްޖެއިން ސޮއިކޮށް ތަސްދީޤުކޮށްފައިވާ ބައިނަލްއަޤްވާމީ މުޢާހަދާތަކުގެ ދަށުން، ކޮރަޕްޝަން ހުއްޓުވާ މަނާކުރުމަށް ދައުލަތުގެ ފަރާތުން ހަރުދަނާ ފިޔަވަޅުތަކެއް އެޅުމަށް ލާޒިމްކުރާކަމަށާއި މިގޮތުން، ހެޔޮ ވެރިކަމެއް ޤާއިމްކުރުމުގެ ގޮތުން ޤާނޫނީ ނިޒާމަށް ހަރުދަނާ ބަދަލުތަކެއް ގެނެވި، ކޮރަޕްޝަނާ ދެކޮޅަށް ދިވެހިރާއްޖެއިން ގިނަ މަސައްކަތްތަކެއް ކޮށްފައިވާކަމަށެވެ.

Advertisement

އެހެންނަމަވެސް، އެފަދަ ކުށް ސާބިތުވެ، ހުކުމްކޮށްފައިވާ ފަރާާތްތަކަކަަށް ހުކުމުގެ ބޮޑު ބައެއް ތަންފީޛު ނުވަނީސް އަދަބު ލުއިކޮށްދެއްވުމުގެ ސަބަބުން މިނިވަންވެގެން ދިއުމަކީ، ކޮރަޕްޝަން ހުއްޓުވައި މަނާކުރުމަށް އަޅާފައިވާ ހަރުދަނާ ފިޔަވަޅުތަކަށް އެޅިގެންދިޔަ ހުރަހެއްކަމަށެވެ.

ދައުލަތް ހިންގުމުގެ އެންމެ އިސް ފަރާތަށް މަޢާފުދިނުމާއި އަދަބު ލުއިކޮށްދިނުމުގެ ޤާނޫނުގެ ދަށުން، ކުށުގެ ބާވަތަށް ރިޢާޔަތްކުރުމެއް ނެތި، ކުށުގެ އަދަބަށް ކަނޑައަޅާފައިވާ މުއްދަތުގެ ހަތަރުބައިކުޅައެއްބައި ތަންފީޒުވެ ނިމިފައިވާ ފަރާތްތަކުގެ އަދަބު ލުއިކޮށްދިނުމުގެ ބާރު ލިބިދީފައިވުމަކީ، ޖިނާއީ ޤާނޫނުތަކުގެ ދަށުން ޖިނާއީ ބޮޑެތި ކުށްތަކަށް ބޮޑެތި އަދަބުތައް ކަނޑައަޅާފައިވާ މަޤްސަދު ހާސިލްވުމަށް ހުރަސް އެޅޭ ގޮތަށް ލިބިދޭ ބާރެއް ކަމުގައި ދެކޭކަމަށް އެޗައާރުސީން ވަނީ ބުނެފައެވެ.

މީގެ އިތުރުންވެސް އެއިދާރާއިން ބުނީ ބޮޑެތި ކުށްކުރާ ފަރާތްތަކާއި ކުދި ކުށްތަކުގައި ކުށް ސާބިތުވާ ފަރާތްތަކަށް މަޢާފުދިނުމާއި އަދަބު ލުއިކޮށްދިނުމުގެ ޤާނޫނުގެ ދަށުން އަދަބު ލުއިކޮށްދިނުމުގެ ފުރުސަތު އެއް ހަމައަކުން ލިބިދީފައިވުމަކީ ކްލެމެންސީ ދިނުމުގައި އެންމެ އިންސާފުވެރި ގޮތެއް ނޫންކަމަށް ދެކޭކަމަށެވެ. 

ޖިނާއީ ބޮޑެތި ކުށްތަކަށް ބޮޑެތި އަދަބުތައް ކަނޑައަޅާފައިވާ މަޤްސަދު ޙާޞިލްކުރުމަށްޓަކައި މަޢާފުދިނުމާއި އަދަބު ލުއިކޮށްދިނުމުގެ ޤާނޫނު ވީ އެންމެ އަވަހަކަށް އިޞްލާޙުކުރުމަކީ ކޮންމެހެން ބޭނުންތެރިކަމެއް ކަމުގައި މި އެޗްއާރުސީން ގަބޫލު ކުރާކަމަށް ވަނީ ބުނެފައެވެ.

ރައީސް އިބްރާހިމް މުހައްމަދު ޞާލިހުގެ ރިޔާސީ ދައުރު ފެށިގެންއައީ ކޮރަޕްޝަންގެ ޢަމަލުތައް ހުއްޓުވާ ވަކިން ޚާއްސަކޮށް އެމްއެމްޕީއާރުސީ ކޮރަޕްޝަންގެ މައްސަލަ ތަޙްޤީޤުކޮށް ފިޔަވަޅުއަޅައި، ޖުމްލަކޮށް ކޮރަޕްޝަންގެ ޢަމަލުތަކަށް ޒީރޯ ޓޮލަރެންސްގެ ސިޔާސަތުތަކަކާ އެކުގައި ނަމަވެސް، އެމްއެމްޕީއާރުސީ ކޮރަޕްޝަންގެ މައްސަލަ އެކަށީގެންވާގޮތެއްގައި ތަޙްޤީޤުކޮށް ފިޔަވަޅު އެޅުމަށް އެކި އެކި ސަބަބުތަކާހެދި ނުކުޅެދިފައިވާއިރު، ކުށް ސާބިތުވެ ޙުކުމް ތަންފީޒުކުރަމުންދިޔަ ބައެއް ފަރާތްތަކެއްގެ އަދަބު ލުއިކޮށްދިނުމުގެ ސަބަބުން އެ ފަރާތްތައް މިނިވަންވެގެންދިއުމަކީ ޒީރޯ ޓޮލަރެންސް ޓު ކޮރަޕްޝަންގެ ސިޔާސަތާ ޚިލާފު އަދި މީގެ ސަބަބުން ރައްޔިތުންގެ ނުހަނު ކަންބޮޑުވުން އޮތްކަމެކެވެ.