ރިޔާސީ އިންތިހާބުގެ ކެމްޕޭން ތަކުގެ ތެރޭގައްޔާއި މިހާތަނަށް ޕޯޑިއަމްތަކުގައި ދެއްކެވި ކޮންމެ ވާހަކައެއްވެސް ދެއްކެވީ އެ މަސައްކަތްތަކެއް ފުރިހަމަކުރެއްވުމުގެ ފުރިހަމަ އުންމީދާއި އަޒުމާއިއެކުކަމަށް އިންތިހާބީ ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.

މިފަދައިން އިންތިހާބީ ރައީސް ވިދާޅުވީ ހަފްތާ 14 ގެ 172 ވައުދު ފޮތް އިފްތިތާހް ކުރުމުގެ ޖަލްސާގައި ވާހަކަފުޅު ދައްކަވަމުންނެވެ.

ޑރ މުއިއްޒު ވިދާޅުވީ، އިއުލާނުކޮށްފައިވަނީ މެނިފެސްޓޯގައި ހިމެނިފައިވާ ކަންކަމުގެ ތެރެއިން ފުރަތަމަ ސާދަ ހަފްތާގެ ތެރޭގައި އެންމެ މަދުވެގެން ކުރައްވާނެ މަސައްކަތްތައްކަމަށް ވިދާޅުވިއެވެ. ޑރ މުއިއްޒު ވިދާޅުވީ، އެއީ އެއްގޮތަކަށްވެސް ހަމައެކަނި ކުރާނެ މަސައްކަތްތައް ނޫންކަމަށާއި އެމަނިކުފާނުގެ ސަރުކާރުގެ ވުޒާރާތަކާއި ކުންފުނިތަކުން އެއަށްވުރެ މާ ގިނަ ކާމިޔާބީތައް ހާސިލުކުރުމަށް ކަނޑައަޅާފައިވާނެ ކަމަށް ވިދާޅުވިއެވެ.

Advertisement

 ޑރ މުއިއްޒުވަނީ އެމަނިކުފާނު ބަހާއި އެއްގޮތަށް އަމަލުކުރައްވާނެކަމުގެ ޔަގީންކަން ދެއްވާފައެވެ. އަދި ފުރަތަމަ 14 ހަފްތާގެ ތެރޭގައި ކުރުމަށް ކަނޑައެޅިފައިވާ މަސައްކަތްތައް އިއުލާނު ކުރެއްވީވެސް އެ މަގުސަދުގައިކަމަށް ފާހަގަކުރެއްވިއެވެ.

ބަޖެޓާއި އާމްދަނީ ހޯދޭ މިންވަރުގެ އިތުރުން ރާވާ ރޭވުންތަކުގެ އިތުރުން ރައްޔިތުންނާއި އެކު ކުރެވޭ ޕްލޭންތަކުގެ ނަތީޖާއަކަށް ވެގެންދާނީ ފުރަތަމަ 14 ހަފްތާގެ ޕްލޭނަށްވުރެ އިތުރަށްވެސް ހާސިލުވެގެންދިއުންކަމަށްވެސް އެމަނިކުފާނު ވަނީ ވިދާޅުވެފައެވެ.