އިންތިޚާބީ ރައީސް ޑރ. މުޙައްމަދު މުއިއްޒުގެ ހަފްތާ 14ގެ 161 ވައުދުގައި އަންހެނުންނަށް ޚާއްޞަ 100 މިލިއަން ރުފިޔާގެ 'ސްޓާޓްއަޕް ލޯން ސްކީމް'އެއް ތައާރަފު ކުރާނެކަން އިއުލާންކޮށްފިއެވެ.

އަންނަ ހުކުރު ދުވަހު ވެރިކަމުގެ ހުވާ ކުރައްވާ ޑރ.މުއިއްޒުގެ ފުރަތަމަ 100 ދުވަސް ތެރޭގައި ކުރައްވާނެ ކަންތައްތަކުގެ ރޭވުން، މިރޭ ވަނީ އެކަމަށް ޓަކައި ދަރުބާރުގޭގައި ބޭއްވި ހަފުލާއެއްގައި އިއުލާންކޮށްފައެވެ.

އެ ރޭވުމުގައި އަންހެނުންނާއި ޒުވާނުންނާއި ފަންނިއްޔަތާއި ކުޅިވަރަށް ޚާއްޞަކޮށް ސަރުކާރުން ކުރާނެ ކަންތައްތަކުގެ ތެރޭގައި، 100 ދުވަހުގެ މުހުލަތެއް ދީފައިވާ ކަންތައްތަކުގެ ތެރޭގައި އަންހެނުންނަށް ސްޓާޓްއަޕް ސްކީމެއް އުފެއްދުމުގެ އިތުރުން އަންހެން މުވައްޒަފުންނަށް ރައްކާތެރި، ގަދަރުވެރި އަދި ހަމަހަމަ މަސައްކަތުގެ މާހައުލެއް ކަށަވަރު ކޮށްދިނުމަށް ޓަކައި ގާނޫނީ އޮނިގަނޑަށް އިސްލާހު ހުށަހެޅުމަށް ހިމަނާފައިވެއެވެ.

ހަމައެއާއެކު، އަންހެނުން އުފައްދާ އުފެއްދުންތައް ވިއްކުމަށް ޚާއްޞަ ސަރަހައްދެއް ހުޅުމާލޭގައި ކަނޑައަޅައި، ވިޔަފާރި ކުރުމަށް ފަސޭހަ އިންތިޒާމުތަކެއް، ފުރަތަމަ 63 ދުވަސް ތެރޭގައި ހަމަޖައްސައިދިނުން ހިމެނެއެވެ.

އަންހެނުންނަށް ޚާއްޞަކޮށްފައިވާ އިތުރު ކަންތައްތަކުގެ ތެރޭގައި، ދައުލަތާއި ދައުލަތް ހިއްސާވާ އިސް މަގާމުތަކުގައި އަންހެނުން އިތުރު ކުރުމުގެ މަސައްކަތް ވެރިކަމުގެ ފުރަތަމަ ދުވަހު ފެށުމާއި 63 ދުވަހުގެ ތެރޭގައި، ރައްޔިތުންގެ މަޖިލީހުގައި އަންހެނުންގެ ބައިވެރިވުން އިތުރުކުރުމަށް ކަމާ ގުޅުންހުރި އެކި ފަރާތްތަކާއެކު މަސައްކަތް ފެށުން ޑރ.މުއިއްޒުގެ ހަފްތާ 14ގެ 161 ވައުދުގައި ހިމަނާފައިވެއެވެ.

އަންހެނުންނަށް ވިޔަފާރިތައް ފަށައި މަސައްކަތް ކުރުމުގެ މަގު ތަނަވަސްކުރުމަށްޓަކައި ލޯން ސްކީމެއް ތައާރަފު ކުރުމަކީ މުއިއްޒުގެ ރިޔާސީ ވައުދެކެވެ.