އިންތިހާބީ ރައީސް ޑރ މުހައްމަދު މުއިއްޒު ހުވާކުރެއްވުމުގެ ރަސްމިއްޔާތަށް ޗައިނާގެ ރައީސް ޝީ ޖިންޕިންގެ ހާއްސަ މަންދޫބު ރާއްޖެއަށް ވަޑައިގެންފި އެވެ.

މި ރަސްމިއްޔާތުގައި ޗައިނާ ތަމްސީލު ކުރައްވާނީ ރައީސްގެ ހާއްސަ މަންދޫބު އަދި ސްޓޭޓް ކައުންސިލަރު ޝެން ޔިކްސިން އެވެ. ޝެން ޔިކްސިނަށް އެއާޕޯޓުގައި މަރުހަބާ ދެންނެވީ ކުރީގެ ޓޫރިޒަމް މިނިސްޓަރު މޫސާ ޒަމީރެވެ.

ޝެން އަށް މަރުހަބާ ވިދާޅުވެ މޫސާ ޒަމީރު މިއަދު ކުރެއްވި ޓްވީޓެއްގައި ވިދާޅުވެފައި ވަނީ ރާއްޖެ އާއި ޗައިނާގެ ގުޅުމަކީ ވަރުގަދަ ގުޅުމެއް ކަމަށާއި ޚާރިޖީ ސިޔާސަތުގައި އެގައުމަކީ ދިވެހި ރާއްޖޭގެ ވަރަށް މުހިއްމު ބައިވެރިއެއް ކަމަށެވެ. އަދި ޗައިނާއިން ރާއްޖެއާއި ދެމެދު އޮންނަ ގާތްގުޅުމުގެ އަގުވަޒަންކުރާ ކަމަށް ވެސް އޭނާ ވިދާޅުވި އެވެ.

ރިޕޯޓްތައް ބުނާގޮތުން ޝެން ދަތުރުފުޅު ނިންމަވާލެއްވުމަށްފަހު ފުރާވަޑައިގަންނަވާނީ މިމަހުގެ 18 ވަނަ ދުވަހުއެވެ.

މި ހުކުރު ދުވަހު ބާއްވާ ހުވާ ކުރެއްވުމުގެ ރަސްމިއްޔާތުގެ ދައުވަތު ރާއްޖޭގެ އެކުވެރި ގައުމުތަކަށް ވަނީ ފޮނުވާފައެވެ.

އަވަށްޓެރި އިންޑިއާ އިން މި ރަސްމިއްޔާތަށް އެގައުމުގެ ބޮޑުވަޒީރުގެ މަންދޫބެއްގެ ގޮތުން އިންޑިއާގެ އާރތް އެންޑް ސައިންސް މިނިސްޓަރު ކިރެން ރިޖިޖޫ ފޮނުވުމަށް ވަނީ ހަމަޖެހިފައެވެ.