މިއަހަރަށް ސަރުކާރުން ހުށަހަޅާފައިވާ ސަޕްލިމަންޓަރީ ބަޖެޓާމެދު ދިވެހި ރާއްޖޭގެ މަރުކަޒީ ބޭންކު، އެމްއެމްއޭއިން ގިނަ ކަންބޮޑުވުންތަކެއް ފާހަގަކޮށްފިއެވެ.
ސަޕްލިމަންޓަރީ ބަޖެޓާމެދު މަރުކަޒީ ބޭންކުގެ ލަފައަށް ރައްޔިތުންގެ މަޖިލީހުން އެދުމާ ގުޅިގެން އެމްއެމްއޭގެ ގަވަރުނަރު އަލީ ހާޝިމް ސޮއިކުރައްވައި ފޮނުއްވި ސިޓީގައި ބޮޑެތި ކާރިސާތައް ކުރިމަތިވެ އިޤުތިޞާދީ ލޮޅުން އަރާ ހާލަތުގައި މެނުވީ ސަޕްލިމަންޓަރީ ބަޖެޓު ހުށަނޭޅުމަށް ލަފާދީފައިވެއެވެ.
އަދި ކުރިއަށް އޮތް ތަނުގައިވެސް ޚަރަދު ހަމަޖައްސަން ސަޕްލިމަންޓަރީ ބަޖެޓު ހުށަހަޅަންނުޖެހޭ ގޮތަށް ބަޖެޓުގެ އޯވާސައިޓު އިންތިޒާމުތައް ހަމަޖެއްސުމަށް އެ ބޭންކުން ލަފާދެއެވެ.
ގަވަރުނަރު އަލީ ހާޝިމް އިތުރަށް ފާހަގަކުރެއްވި އެއް ނުކުތާއަކީ ހުށަހަޅާފައިވާ ސަޕްލިމަންޓަރީ ބަޖެޓުގައި 4.2 ބިލިއަން ރުފިޔާ ބޭރުގެ ފަރާތްތަކުން ދަރަންޏަށް ހޯދުމަށް ހިމަނާފައިވާ ކަމެވެ. މި އަހަރުގެ ފާއިތުވި ތަނުގައި ލިބޭނެކަމަށް އަންދާޒާކުރި މިންވަރަށް ބޭރުގެ ފައިނޭންސިންއާއި ހިލޭ އެހީ ލިބިފައި ނެތުމުން، ކުރިއަށް އޮތް ދޮޅުމަސްދުވަހުގެ ތެރޭގައި ސަޕްލިމަންޓަރީ ބަޖެޓުގައި ހޯދުމަށް ކަނޑައެޅި ފައިސާ ނުލިބުމުގެ ފުރުސަތުގެ ބޮޑުކަމަށްވެސް އެމްއެމްއޭއިން ވަނީ ފާހަގަ ކޮށްފައެވެ.
މި އަހަރު އެކަނިވެސް ގިނަ އަދަދެއްގެ ފައިސާ ޗާޕުކުރަންޖެހުނުކަމަށާއި، 2022 ވަނަ އަހަރުގެ ތެރޭގައި ޗާޕުކުރި ފައިސާއިން ބޮޑު އަދަދެއް މިހާރު ސަރުކާރުން ސެކިއުރިޓައިޒްކޮށް ދިގު މުއްދަތުން އަދާކުރާ ބޮންޑަކަށް ބަދަލުކުރުމަށްފަހު، މި އަހަރު ޗާޕުކުރި ފައިސާގެ ތެރެއިން 4.3 ބިލިއަން ރުފިޔާ ސެކިއުރިޓައިޒްކޮށްފައިވާކަން އެމްއެމްއޭއިން ފާހަގަކުރިއެވެ. ހަމައެހެންމެ ދައުލަތުގެ ރިޒާވް އެއް މިންގަނޑެއްގައި ހިފަހެއްޓުމަށް ބޭރުން ހޯދަން ކަނޑައަޅާފައިވާ 4.2 ބިލިއަން ރުފިޔާ ހޯދުމަކީ މުހިއްމު ކަމެއްކަމަށާއި، ބައިނަލްއަޤުވާމީ ބާޒާރުގައި ތެލުގެ އަގަށް އައިސްފައިވާ ބަދަލުތަކުގެ ސަބަބުން ރިޒާވަށް ބޮޑެތި ދަތިތައް ކުރިމަތިވެފައިވާކަމަށް އެ އިދާރާއިން ބުނެއެވެ.
މިހުރިހާ ކަމަކަށް އަލިއަޅުވާލާ އެމްއެމްއޭއިން އެދުނީ ދައުލަތުގެ ރިކަރަންޓު ޚަރަދުތައް ކުޑަކުރުމަށެވެ. އަދި ކެޕިޓަލް ޚަރަދުތައް ހިންގުމުގައި ކޮންމެހެން ހިންގަންޖެހޭ ކަންކަމަށް އިސްކަން ދިނުމަށެވެ.
Advertisement
This content is created and paid for by advertisers and does not involve Voice Journalists
