ހުޅުމާލޭގެ އެކި ސަރަހައްދުތަކުގެ ދުވާރު މަތީގައި ވިޔަފާރިކުރުމަށާއި އެހެނިހެން ބޭނުންތަކަށް ބަހައްޓާފައިވާ ގޮނޑިތަކާއި މޭޒުތައް ނެގުމަށް އާބަންކޯ އިން އަންގައިފިއެވެ.

އާބަންކޯ އިން ކުރި އިއުލާނުގައި ބުނީ ޕޭވްމަންޓާއި ހެޖުތެރޭގައި ކެފޭ، ރެސްޓޯރެންޓު އަދި ޖޫގޯ ޕޮއިންޓްތަކުން ގަވައިދާ ހިލާފަށް ގޮނޑި އާއި މޭޒު ބަހައްޓައިގެން ވިޔަފާރި އުސޫލުން ޚިދުމަތްދެމުން ގެންދާކަން ފާހަގަ ވެފައިވާކަމަށެވެ. 

އެހެން ކަމުން އެ ސަރަހައްދުގައި ވިޔަފާރި އުސޫލުން ބޭނުންކުރުމަށް ބަހައްޓާފައިވާ ގޮނޑިއާ މޭޒުތައް މިމަހުގެ 20ވާ  ހޯމަ ދުވަހުގެ ކުރިން ނެގުމަށް އެ ކުންފުނީގެ އިޢުލާނުގައި ވަނީ އަންގައިފައެވެ. 

އަދި އެ މުއްދަތުގެ ތެރޭގައި އެ ތަކެތި ނުނަގައިފިނަމަ، އެ ތަކެތި ނަގައި އެ ތަންތަން ސާފުކުރުމުގެ މަސައްކަތް އެ ކުންފުނިން ކުރިއަށް ގެންދާނެ ކަމަށްވެސް އެ އިއުލާނުގައި ވަނީ ބުނެފައެވެ. 

މިގޮތުން ސާފުކުރުމުގެ ތެރޭގައި އެއްވެސް މުދަލަކަށް ލިބޭ ގެއްލުމަކަށް އާބަންކޯ އިން ޒިންމާ ނުވާނެ ކަމަށްވެސް ބުނެފައި ވެއެވެ.

މީގެ އިތުރުން އާބަންކޯ އިން އިއްޔެ ކުރި އިއުލާނެއްގައި ވަނީ ހިޔާ ފްލެޓު ސަރަހައްދުގެ ބީޗު ސަރަހައްދުގައި ބަހައްޓާފައިވާ ހެދިކާ ހަޓުތައް ވެސް ނެގުމަށް އަންގައިފައެވެ.