އިންޓަރނޭޝަނަލް އެއިޑްސް ކެމްޕޭނުން ޣައްޒާގެ އިންދޮނީސީ ހޮސްޕިޓަލަށް މެޑިކަލް ސާމާނު ފޯރުކޮށްދީފިއެވެ.

އައިއޭސީ އިން ބުނީ ޣައްޒާގެ އިންޑޮނީސީ ހޮސްޕިޓަލަށް ދިވެހި ރައްޔިތުންގެ އެހީގައި ބޭސް ފޯރުކޮށްދެވިއްޖެ ކަމަށެވެ. އައިއޭސީ އިން ބުނީ އަނިޔާވެރި ޞަޙްޔޫނީންގެ ހަމަލާތަކުގައި އަނިޔާވާ މީހުންނަށް ފަރުވާދިނުމުގައި ޣައްޒާގެ ހުރިހާ ހޮސްޕިޓަލަކަށް ވެސް ވަނީ ބޮޑެތި އުނދަގޫތަކާއި ކުރިމަތިލާން ޖެހިފައި ކަމަށެވެ. އެގޮތުން އިންޑޮނީސީ ހޮސްޕިޓަލަށްވެސް ވަނީ ކަރަންޓާއި ބޭސްފަރުވާގެ ސާމާނު ލިބުމުގެ ދަތިކަން ފޯރާފައި ކަމަށްވެސް އައިއޭސީ އިން ބުނެފައިވެއެވެ.

އައިއޭސީ އިން ބުނީ 10،000 ޑޮލަރުގެ މެޑިކަލް ސާމާނު ޣައްޒާގެ އިންދޮނީސީ ހޮސްޕިޓަލަށް ހަދިޔާކުރެވިފައިވާ ކަމަށެވެ.

މީގެ ދެދުވަސް ކުރިން އައިއޭސީ އިން ތައްޔާރުކުރި އެހީ ޤާފިލާއެއް ވަނީ ރަފާޙް ބޯޑަރު ހުރަސްކުރާ ސަރަހައްދަށް ގޮސްފައެވެ.

އައިއޭސީ އިން ބުނީ އެ ޤާފިލާގައި މުޅި ޖުމްލަ 6 ޓްރަކް ހިމެނޭނެ ކަމަށާއި އެއީ 40 ފޫޓުގެ ކޮންޓެއިނަރތަކެއް ކަމަށެވެ. އަދި އެ ޤާފިލާގައި 3 ޓްރަކް މެޑިކަލް ސާމާނާއި، 2 ޓްރަކް ފެން އަދި 1 ޓްރަކް ގޮދަން ފުށް ހިމެނޭކަމަށެވެ.

އައިއޭސީ އިން ދަނީ ޣައްޒާގެ ރައްޔިތުންނަށް އެހީ ފޯރުކޮށްދެވެން މަގުފަހިވަމުން ދާ މިންވަރަކުން އެހީފޯރުކޮށްދެމުންނެވެ.