ދިވެހިރާއްޖެ މިވަގުތު މިއޮތީ އިގްތިސާދީ ގޮތުން ނާޒުކުރު ފައްތަރެއްގައި ކަމަށް ކަމަށް ރައްޔިތުންގެ މަޖިލީހުގެ ކުރީގެ ރައީސް އަދި މަޖިލީހުގެ މައްޗަން ގޯޅި މެދު ދާއިރާގެ މެމްބަރު މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ވެރިކަން މިއަދު ނިމިގެންދާއިރު އެމަނިކުފާނާއި، އެމަނިކުފާނުގެ ސަރުކާރު ހިންގަމުންދާ މައި ޕާޓީ، އެމްޑީޕީން ދައުރު ނިންމާލަނީ، މަދުން ނޫނީ ދިވެހި ވެރިކަމެއްގައި ދިވެހި ޚަޒާނާއަށް ދަތި ނުވާ މިންވަރަށް ދަތި ކުރައްވާފައި ކަމަށެވެ. 

އެހެންކަމުން ރާއްޖެ އޮތީ މާލީ ގޮތުން ވަރަށް ނާޒުކު ފައްތަރެއްގައި ކަމަށާ، ބަޖެޓް ސަޕޯޓް ހޯދުމަށް އިންތިޚާބީ ރައީސް ޑރ މުހައްމަދު މުއިއްޒަށްވެސް ދަތިވާނެ ކަމަށް ނަޝީދު ވިދާޅުވި އެވެ. 

"އަޅުގަނޑުމެން މި ތިބީ ވަރަށް ނާޒުކު ފައްތަރެއްގައި. ޑރ. މުއިއްޒުއަށް ވެސް އަވަހަށް ބަޖެޓު ސަޕޯޓު ހޯދަން ދަތިވާނެ. ޑިސެމްބަރު ވާނީ އުނދަގޫ މަހަކަށް،"

މަޖިލީހުގެ ތަޅުމުގައި ސަޕްލިމެންޓްރީ ބަޖެޓަށް ބަހުސް ކުރައްވަމުން ވެސް ރައީސް ނަޝީދު ވަނީ، ރާއްޖޭގެ މާލީ ހާލަތާއިމެދު ކަންބޮޑުވުން ފާޅުކުރައްވާފައެވެ. އަދި ސަޕްލިމެންޓްރީ ބަޖެޓަކީ މި ސަރުކާރުން ކޮށްފައިވާ ވައްކަމުގެ ރަސީދެއް ކަމަށްވެސް އެމަނިކުފާނު ވިދާޅުވި އެވެ. 

"މިއީ ސަޕްލިމެންޓްރީ ބަޖެޓެއް ނޫން. މިއީ ވައްކަމުގެ ރަސީދެއް. ވަރަށް މަދުން ވައްކަމުގެ ރަސީދެއް އަޅުގަނޑުމެންނަށް ލިބޭނީ. އެއްޗެއް ގަތީމާ ގިނަ ފަހަރަށް ރަސީދެއް މި ލިބެނީ. މިއޮތީ. މާލީ ވަޒީރާއި ސަރުކާރު ވައްކަން ކުރައްވާފައި، ރަސީދެއް މިތަނަށް ފޮނުއްވާފައި. މިއޮތީ ވައްކަމުގެ ރަސީދެއް. މިއަށްވުރެ ވަރުގަދަ ހެއްކެއް، ވަރުގަދަ ގަރީނާއެއް ނެތް. މިއޮތީ ބައިތުލްމާލުން އެތައް ބައެއް ނަގާފައި." ނަޝީދު ވިދާޅުވި އެވެ. 

އަދި ބޭރު ގައުމަކުން އިންތިހާއަށް ފައިސާ ނުދީފިނަމަ، މި އަހަރު ނިމޭއިރު ތިބެންޖެހޭނީ މުސާރަ ވެސް ނުދީކަމަށާ، މި ސަރުކާރަށް މި ފަސް އަހަރު ތެރޭ ޚަރަދެއް ނުބެލެހެއްޓުނު ކަމަށް އެ މަނިކުފާނު ތުހުމަތުކުރެއްވިއެވެ.