ދިވެހި ރައްޔިތުންގެ ފަރާތުން ފާއިތު ވެގެން ދިޔަ 5 އަހަރު ތެރޭ ލިބުނު އެއްބާރުލެއްވުމާއި ބެހެއްޓެވި ގާތް ރަހްމަތްތެރި ކަމަށްޓަކައި ނިމިގެންމިދާ ދައުރުގެ ނައިބު ރައީސް ފައިސަލް ނަސީމް ޝުކުރު ދަންނަވަވަިފިއެވެ.

ނައިބު ރައީސް މިފަދައިން ވިދާޅުވީ ރައްޔިތުންނާއި މުހާތަބު ކޮށް މިއަދު ދެއްވި ވަދާއީ މެސެޖްގައެވެ.

އެ މެސެޖުގައި ފައިސަލް ވިދާޅުވެފައިވަނީ  މަގާމުގެ ހައިސިއްޔަތުން ރައްޔިތުންނަށް ހިދުމަތް ކުރުމުގައި އިއްޒަތްތެރި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް އޭނާއަށް ކުރެއްވި އިތުބާރާއި ބެހެއްޓެވި އެކުވެރިކަމަށްޓަކައި ވަރަށް އިހްލާސްތެރި ކަމާއެކު އެމަނިކުފާނަށް ޝުކުރު ދަންނަވާކަމަށެވެ.

Advertisement

“އަދި ލޮބުވެތި ދިވެހި ރައްޔިތުންގެ ފަރާތުން އަޅުގަނޑަށް ލިބުނު އެއްބާރުލެއްވުމާއި ބެހެއްޓެވި ގާތް ރަހްމަތްތެރި ކަމަށްޓަކައި ނުހަނު އިހްތިރާމާއި ލޯތްބާއެކު ޝުކުރު ދަންނަވަން” ފައިސަލް ވިދާޅުވެފައިވެއެވެ.

ފައިސަލްގެ މެސެޖުގައި ވިދާޅުވެފައިވަނީ މި ވޭތުވެދިޔަ ފަސް އަހަރު ތެރޭގައި އެމަނިކުފާނު މަސައްކަތްކޮށްފައިވާނީ ކުރެއްވި ހުވައިގައި ސާބިތުވެހުރެ ދިވެހިރާއްޖޭގެ ގާނޫނު އަސާސީން ރައީސުލްޖުމްހޫރިއްޔާގެ ނައިބާ މަތިކޮށްފައިވާ އެންމެހާ ޒިންމާތަކާއި މަސްއޫލިއްޔަތުތައް ތެދުވެރިކަމާ އަމާނާތްތެރި ކަމާއެކު އަދާކުރުމަށް ކަމަށެވެ. އަދި އަމާޒަކަށް ހެދީ ސަރުކާރުގެ ސިޔާސަތުތައް ތަންފީޒުކުރުމުގައި ދިވެހި ދައުލަތަށާއި ރައީސުލްޖުމްހޫރިއްޔާއަށް ވަފާތެރިވެ އެއްވެސް ރައްޔިތަކު ތަފާތުނުކޮށް އިހްލާސްތެރި ކަމާއެކު ހިދުމަތް ދިނުމަށްކަމަށެވެ.

“ދިވެހި ރައްޔިތުންގެ ފުރިހަމަ ނިންމުމާއެކު ދިވެހި ގައުމު މިއަދު އަނެއްކާވެސް އަލިވިލިގެން މިދަނީ ރާއްޖޭގެ ދުސްތޫރީ ތާރީހުން މުޅިން އާ ދައުރަކަށް. މިއަދު މި ފެށޭ ރިޔާސީ އާ ދައުރަކީ ދިވެހި އުންމަތަށް ހުރިހާ ގޮތަކުންވެސް ތަރައްގީއާއި ކުރިއެރުން ގެނެސްދޭނޭ ދައުރަކަށް ވާނޭ ކަމުގައި އަޅުގަނޑު އުންމީދުކުރަން” ނައިބުރައީސް ފައިސަލް ނަސީމް ވިދާޅުވެފައިވެއެވެ.

ފައިސަލް އިތުރަށް ވިދާޅުވީ ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ މަގާމާ މިއަދު ހަވާލުވެވަޑައިގަންނަވާ އިންތިހާބީ ރައީސް ޑރ. މުހައްމަދު މުއިއްޒަށާއި ރައީސުލްޖުމްހޫރިއްޔާގެ ނައިބު ހުސެއިން މުހައްމަދު ލަތީފަށް އަދި އެބޭފުޅުންގެ ސަރުކާރަށާއި ދިވެހިރައްޔިތުންނަށް ފުރިހަމަ ކާމިޔާބާއި ކުރިއެރުމަށްއެދި މާތް الله ގެ ހަޒްރަތުގައި ދުއާ ދަންނަވާކަމަށާއި ދިވެހި ގައުމާއި ދިވެހިން ތާ އަބަދަށް މިނިވަންކަމާއި ފާގަތި ކަމުގައި ލެއްވުމަށް މާތް الله ސުބްހާނަހޫ ވަތައާލާއަށް ދުއާ ދަންނަވާކަމަށެވެ.