ދައުރު ނިމެން ކުޑަ ދުވަސްކޮޅަކަށް ވެފައި ވަނިކޮށް އެމްއެމްޕީއާރުސީގެ ޚިޔާނާތުގެ ކުށް ސާބިތު ޖަލުހުކުމްކޮށްފައިވާ ކުރީގެ ނައިބު ރައީސް އަހުމަދު އަދީބަށް ރައީސް އިބްރާހިމް މުހައްމަދު ޞާލިހު މަޢާފުކޮށްދެއްވުމާއެކު، އަދީބު ރާއްޖެއިން ބޭރަށް ފުރައިފި އެވެ.

އަދީބު ރާއްޖެއިން ބޭރަށް ފުރީ ރޭގެ ވަގުތެއްގަ އެވެ. އެހެން ނަމަވެސް ދިޔައީ ކޮން ތަނަކަށްކަން އެނގިފައެއް ނެތެވެ.

އެމްއެމްޕީއާރުސީގެ ހިޔާނާތުގެ ކުށް ސާބިތުވެ 20 އަހަރުގެ ޖަލު ހުކުމެއް ތަންފީޒު ކުރަމުންދިޔަ އަދީބަށް ރައީސް ޞާލިހުގެ ދައުރު ނިމެން ފަސް ދުވަހަށް ވެފައި ވަނިކޮށް ވަނީ މައާފުދީ މިނިވަން ކޮށްފައެވެ.

Advertisement

އަދީބުގެ އިތުރުން، އެ ޚިޔާނާތުގައި އަދީބުގެ ޕާޓުނަރު ކުރީގެ މެނޭޖިން ޑިރެކްޓާ އަބްދުﷲ ޒިޔަތަަށް ވެސް ވަނީ ރައީސް ޞާލިހު މައާފުދެއްވާފަ އެވެ. 

ކުރީ ސަރުކާރުގައި އަދީބަށް ލުއި ދިނީ ޕެރޯލް ގާނޫނުގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުންނެވެ. 

އެމްއެމްޕީއާރްސީގެ ހިޔާނާތުގައި ދައުލަތަށް ލިބެންޖެހޭ 1.3 ބިލިއަނަށްވުރެ ގިނަ ރުފިޔާ ވަގަށްނެގިއިރު، އަދީބު އެއިރު ހުންނެވީ ފަތުރުވެރިކަމާ ބެހޭ މިނިސްޓަރުގެ މަގާމުގަ އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި އެމްއެމްޕީއާރުސީއަށް ލިބެން ޖެހޭ ފައިސާގެ ތެރެއިން ދެ ބިލިއަނަށްވުރެ ގިނަ ރުފިޔާއަށް ހިޔާނާތްތެރިވިކަމުގެ ކުށް ސާބިތުވުމާއެކު އަދީބު ވެސް ހުރީ 20 އަހަރުގެ ޖަލު ހުކުމެއްގަ އެވެ.

އެހެން ނަމަވެސް ރައީސް ޞާލިހުގެ ސަރުކާރުން ފިން ލުޔާއެކު އަދީބު ޖަލު ހުކުން ތަންފީޒު ކުރަމުން ގެންދިޔައީ އަމިއްލަ ގޭގައި ހުރެގެންނެވެ. 

އަދީބަށް ތުހުމަތުކުރެވޭ މައްސަލަތައް ބެލުމަށްފަހު، ޕްރޮސެކިއުޓާ ޖެނެރަލް ހުސެއިން ޝަމީމު ވަނީ އޭނާގެ މައްޗަށް މަދުވެގެން 800 އަހަރުގެ ޖަލު ހުކުމެއް އަންނާނެކަމަށް ވިދާޅުވެފަ އެވެ.

އެހެން ނަމަވެސް، ދައުލަތުން އަދީބާއެކު ހެދި އިއުތިރާފު އެއްބަސްވުމާއެކު، އަދީބުގެ ހުކުމަށް ބޮޑެތި ލުއިތަކެއް ވަނީ ދީފައެވެ. އޭގެ އިތުރުން އަދީބަށް ތުހުމަތު ކުރެވޭ ޓެރަރިޒަމްގެ ބޮޑެތި މައްސަލަތައް ވެސް ނުބެލުމަށް ވަނީ ނިންމާފަ އެވެ. 

އެމްއެމްޕީއާރުސީގެ ޚިޔާނާތް ބަލާ، އެކަމުގައި ާމިލުވާ ހުރިހާ އެންމެންނަށް ޤާނޫނުގައި ކަނޑައަޅާފައިވާ އަބަދު ދެއްވާނެކަމަށް ރައީސް އިބްރާހިމް މުހައްމަދު ޞާލިހު ވައުދުވެވަޑައިގެން ނަމަވެސް، ދައުރު ނިންމަވާލައްވަމުން، އެ ޚިޔާނާތުގެ މޭސްތިރިން، އަދި ކުށް ސާބިތުވެފައިވާ އެ މުޖުރިމުންނަށް މަޢާފު ދެއްވުމާއި ގުޅިގެން، ގިނަ ބައެއްގެ ނުރުހުން ވަނީ ރައީސް ޞާލިހަށް އަމާޒުވެގެން ގޮސްފަ އެވެ.