މާލޭގައި ގިނަ ދުވަސްތަކެއް ވަންދެން ހުރި، ކުރީގެ މުސްކުޅި ގަޑިބުރު އަލުން ޒަމާނީ ފަރުމާއަކަށް ތަރައްޤީކޮށް، މިރޭ އިފްތިތާޙްކޮށްފިއެވެ. 
ގަޑިބުރު ހުޅުވާދެއްވީ މިރޭ ގަޑި ބުރު ހުޅުވުމަށް ބޭއްވުނު ރަސްމިއްޔާތުގައި ރައީސުލް ޖުމްހޫރިއްޔާ ޑރ.މުހައްމަދު މުއިއްޒުއެވެ.

 މާފަންނު އޯކިޑްމަގާއި ފަރީދީމަގު ހިމެނޭ ސަރަޙައްދުގައި ތަރައްޤީކޮށްފައިވާ ގަޑިބުރަކީ މާލޭގައި ގިނަ ދުވަސްތަކެއް ވަންދެން ހުރި ތަނެކެވެ.

ގަޑިބުރު އަލުން އިމާރާތް ކުރުމުގެ މަސައްކަތް ކުރީ ރަޝީދު ކާޕެންޓްރީ އެންޑް ކޮންސްޓްރަކްޝަންސް، އާރް.ސީ.ސީ އިންނެވެ. ގަޑިބުރުގެ މަސައްކަތް ނިމި، އެތަން އާންމުންނަށް ފެންނާނެހެން ދައްކާލާފައިވާއިރު، ރޭގަނޑު ގަޑިބުރު ދިއްލައިލުމުން މަންޒަރު ފެންނަނީ ވަރަށް ހިތްގައިމުކޮށެވެ.

ގަޑިބުރު ވަށައިގެން ހުންނަ ލެޑް ޕެނަލްތަކުގައި އެކި ފަރުމާތައް ދިއްލެއެވެ. އިސްލާމީވަންތަކަން ރަމްޒުވާ ފަރުމާއަކަށް ފަރުމާކޮށްފައިވާ ގަޑިބުރުގައި ހަތަރު ފަރާތުން ފެންނާނެހެން ގަޑިތައް ހުރެއެވެ.

މާފަންނު ގަޑިބުރަކީ ނަވާރަސަތޭކައިގެ ތެރޭގައި ލަންކާއިން ރާއްޖެއަށް ހަދިޔާކުރި ގަޑި ބެހެއްޓި ތަނެވެ. އެހެންނަމަވެސް އެތަނުގައި މިހާރު އެގަޑިއެއް ނެތެވެ.މީގެ ކުރިން ދެ ފަހަރެއްގެ މަތިން ގަޑިބުރު ތަޅާލާ މަރާމާތުކުރިއެވެ.

މިގޮތުން 2016 ވަނަ އަހަރުގެ ފަހުކޮޅު ގަޑިބުރު ތަޅާލާ އޭރުގެ ސަރުކާރުން އެތަން މަރާމާތުކުރިއެވެ. އަނެއްކާގެ އޭގެ ފަހުން 2017 ވަނަ އަހަރުގެ ޖުލައިމަހުވެސް އެތަން ތަޅާލާ އަލުން ވަނީ މަރާމާތުކޮށްފައެވެ.

ބޮޑު ގަޑި ހަދިޔާ ކުރީ ދިވެހީންގެ އެކުވެރި ސްރީލަންކާ ސަރުކާރުންނެވެ. އޭރު ގަޑިބުރު އިފްތިތާހު ކޮށްދެއްވީ ސްރީލަންކާގެ އޭރުގެ ބޮޑުވަޒީރު ޑީބީ ވިޖޭތުންގާ އެވެ. އެއީ ނޮވެންބަރު 22، 1990 ގައެވެ.