ކައުންސިލްތައް ބާރު ސްޕީޑުގައި ހިނގާތަން ދެން ފެންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އާ ގަޑިބުރު އިފްތިތާހު ކުރުމަށް މިރޭ ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ކައުންސިލްތައް ބާރުވެރިކުރުމަކީ ސަރުކާރުގެ މައިގަނޑު އެއް ވިސްނުން ކަމަށާއި ކަންދިމާކުރި ގޮތުން ލާމަރުކަޒީ ނިޒާމުގެ ދެ ފަރާތުގައި މަސައްކަތް ކުރަން ޖެހުމުން ކައުންސިލްތައް ނުހިނގަނީ ކީއްވެގެންކަން ސާފުވެފައިވާ ކަމަށެވެ. އެގޮތުން ކައުންސިލްތައް ބާރުވެރިކުރުވަން ހާއްސަ މިނިސްޓްރީއެއް އުފެއްދެވީ އެ ސަބަބާއި ހުރެ ކަމަށް ރައީސް ވިދާޅުވި އެވެ.
"ދެން ފެނިގެންދާނީ އިރާދަކުރެއްވިއްޔާ ކައުންސިލްތައް ރައްޔިތުން އެދޭ ގޮތަށް ބާރު ސްޕީޑުގައި ސަރުކާރުގެ ފުރިހަމަ އެއްބާރުލުމާ އެކީގައި ހިނގަމުންދާތަން،" ރައީސް ވިދާޅުވި އެވެ.
ރައީސް ވިދާޅުވީ އެމަނިކުފާނު މޭޔަރަކަށް ހުންނެވިއިރު ކުރީގެ ސަރުކާރުން ހުއްދަ ނުދިން ހުރިހާ މަޝްރޫއުތަކެއް ވެސް ދެން ބާރު ސްޕީޑުގައި ހިނގަމުންދާނެ ކަމަށެވެ. ހާއްސަކޮށް ޕާކިން އިމާރާތްތައް ބިނާކުރަން މާލޭ ސިޓީ ކައުންސިލަށް ފުރުސަތު ދޭނެ ކަމަށާއި އޭގެ ސަބަބުން މިހާރު މަގުތަކުގައި ޖެހިފައިވާ ތޮއްޖެހުމަށް ލުއިތަކެއް އަންނާނެ ކަމަށް ގަބޫލުކުރައްވާ ކަމަށް ރައީސް ވިދާޅުވި އެވެ.
މީގެއިތުރުން މާލޭގެ މަގުތައް ހެދުމުގެ މަޝްރޫއު ވެސް ދެން ފެށިގެންދާނެ ކަމަށާއި އެކަން ކުރުމަށްޓަކާ ބަޖެޓުގައި ވެސް ޖާގަ އުފައްދާފައިވާނެ ކަމަށް ރައީސް ވިދާޅުވި އެވެ. އެއީ ބޮޑު މަޝްރޫއަކަށް ވާތީ ސަރުކާރުގެ ވިސްނުމަކީ ބޭރުގެ އެހީތެރިކަން މިކަމުގައި ހޯދުން ކަމަށާއި މާލޭގައި ހުރި ބޮޑެތި މައްސަލަތައް ހައްލުކުރުމަކީ ސަރުކާރުން އެންމެ އިސްކަން ދޭނެ ކަންތައް ކަމަށްވެސް ރައީސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
