ހުޅުމާލޭގައި ހަދަމުން އަންނަ ކޭ ޕާކް ރެސިޑެންސްގެ ފްލެޓްތަކުގެ މައްސަލާގައި ހިންގަމުންދާ ޖިނާއީ ތަހުގީގުގެ ތެރެއިން، އެ ކުންފުނީގެ އެއް ޑިރެކްޓަރު ހަސަން މަމްދޫހު (މަންޑޭ) ދިރިއުޅޭ ގެއަށް ފުލުހުން މިއަދު ވަދެ، ފާސްކުރަން ފަށައިފި އެވެ.
މަންޑޭ ދިރިއުޅޭ ގެ ބަލާ ފާސްކުރަމުން ދަނީ ކޯޓު އަމުރެއްގެ ދަށުން ކަމަށް ބުނުން ފިޔަވާ އިތުރު ތަފްސީލެއް ފުލުހުން ނުދެ އެވެ.
ކޭ ޕާކް އިމާރާތް ކުރަމުން އަންނަ ހަންބޯ ކުންފުނީގެ މައި ހިއްސާދާރު ކަމަށްވާ ޝިއުން ޖިންގެ ފަރާތުން މަންޑޭގެ މައްޗަށް ބޮޑެތި ތުހުމަތުތަކެއް ކޮށް، ފުލުހުންނަށް މައްސަލަ ހުށަހެޅީ މިދިޔަ މެއި މަހު އެވެ. އެ މައްސަލާގައި މަންޑޭ ހައްޔަރުކުރުމަށް ފަހު މިހާރު ދޫކޮށްލާފައި ހުރީ އޭނާގެ ޕާސްޕޯޓު ހިފެހެއްޓުމަށް ފަހުގަ އެވެ.
ހަންބޯ ކުންފުނިން ކުރިން ބުނެފައި ވަނީ މަންޑޭގެ ފަރާތުން 100 އަށް ވުރެ ގިނަ މީހުންނަށް މަކަރާއި ހީލާތް ހަދައިގެން އޮޅުވާލުމުގެ ތެރެއިން އެޕާޓްމަންޓް ވިއްކައިގެން ފައިސާ ހޯދާފައިވާ ކަމަށެވެ. އެ ކުންފުނިން ވަނީ އާބަންކޯއާ އެކު ވެފައިވާ އެއްބަސްވުމާ އެއްގޮތަށް މި އަހަރުގެ ނިޔަލަށް މަސައްކަތް ނިންމަން މަސައްކަތް ކުރަމުން އަންނަ ކަމަށް ވެސް ބުނެފަ އެވެ.
Advertisement
This content is created and paid for by advertisers and does not involve Voice Journalists
