ފަލަސްޠީނުގެ ޣައްޒާގައި ގެދޮރު ގެއްލި ޙާލުގައި ޖެހިފައިތިބި މީހުން ވަގުތީ ހިޔާ ހޯދަމުން ދިޔަ ދެ ސްކޫލަކަށް އިޒްރާއިލުން ހަމަލާދީފިއެވެ.

އަލްޖަޒީރާގައި ބުނެފައިވަނީ ޖަބަލިއްޔާގައި ހުންނަ އަލް ފަޚޫރާ ސްކޫލަށާއި ތާލް އަލްޒަތާރްގައި ހުންނަ ސްކޫލަކަށް އިޒްރާއިލުން ވައިގެ މަގުން ހަމަލާތަކެއް ދީފައި ވާކަމަށާއި އެހަމަލާތަކުގައި ގިނަ ބަޔަކި ޝަހީދު ވެފައިވާކަމަށެވެ.

ފަލަސްޠީނުގެ ހެލްތް މިނިސްޓްރީއާއި ހަވާލާދީ އަލްޖަޒީރާގައި ބުނެފައިވަނީ ފަޚޫރާ އަށް ދިން ހަމަލާގައި 50 އަށްވުރެ ގިނަ މީހުން ޝަހީދުވެފައި ވާކަމަށެވެ. އަދި ދެހަމަލާގައި 100 އަށް ވުރެ ގިނަ މީހުން ޒަޚަމްވެ ޝަހީދުވެފައިވާކަމަށެވެ.

Advertisement

އަލްޖަޒީރާގެ ނޫސްވެރިޔާ ހާނީ މަޙްމޫދް ބުނެފައިވަނީ ސްކޫލްތަކާއި ހޮސްޕިޓަލް ފަދަ ތަންތަނަށް ހަމަލާދިނުން މިހާރު އިޒްރާއިލުން އާންމު ކަމަކަށް ހަދައިފައި ވާކަމަށެވެ.

"ގާތްގަނޑަކަށް 200 އެެއްހާ މީހުން މިހަމަލާތަކުގައިވެސް ޝަހީދުވެއްޖެ، އަދި ޢިމާރާތްތަކުގެ ދަށުން މީހުން ނެގެމުންދާ ވަރަކަށް އެޢަދަދު މަތިވާނެ ކަމަށް ލަފާކުރެވެނީ، މީހުން ހޯދަން ފަކީރާއިންނާއި އަތުން އެދަނީ ކޮންނަމުން" ހާނީ ބުނެފައިވެއެވެ.

އަލް ފަޚޫރާ އަށްހަމަލާދީފައިވަނީ ވަރަށް ހެނދުނުގެ ވަގުތެއްގައި ކަމުން ގިނަ ބަޔަކު ނިދައިފައި ތިބުމުން ގިނަ ބަޔަކު ވަނީ ހަމަލާގެ ޝިކާރައަކަށް ވެފައެވެ.

އިޒްރާއިލުން ޣައްޒާއަށް ދެމުންދާ ހަމަލާތަކުގެ ސަބަބުން ޝަހީދުވި މީހުންގެ ޢަދަދު މިހާރުވަނީ 12،000 އަށް އަރައިގެން ގޮސްފައެވެ. އޭގެ ތެރޭގައި 6000 އެއްހާ ކުޑަކުދިން ހިމެނެއެވެ.