ސައުދީ ޕްރޮފެޝަނަލް ލީގުގެ ޗެމްޕިއަން އަލް އިއްތިހާދުގެ ކޯޗަކަށް ރިވަޕްލޭޓްގެ ކުރީގެ ކޯޗު މާސެލޯ ގަލާޑޯ ހަމަޖައްސައިފި އެވެ.
އުމުރުން 47 އަހަރުގެ ގަލާޑޯ އަލް އިއްތިހާދާއި ގުޅިފައިވަނީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އަދި 2025 ވަނަ އަހަރުގެ ޖޫން މަހުގެ ނިޔަލަށް މި އެއްބަސްވުން ހަމަވާއިރު ކުލަބުން ބޭނުންވެއްޖެނަމަ އިތުރު ދެ އަހަރަށް އެއްބަސްވުމުގެ މުއްދަތު އިތުރުކުރުމުގެ ފުރުސަތު ކުލަބަށް އޮންނަ މާއްދާއެއް މިއެއްބަސްވުމުގައި ހިމަނާފައި ވެއެވެ
2011 ވަނަ އަހަރު އުރުގުއާއީގެ ނަސިއޯނެލް އިން ކޯޗިން ކެރިއަރު ފެށި ގަލާޑޯ، 2014 ވަނަ އަހަރުން ފެށިގެން މިދިޔަ އަހަރުގެ ނޮވެމްބަރު މަހާއި ހަމަޔަށް މަސައްކަތް ކުރީ އާޖެންޓީނާގެ އެންމެ ވަރުގަދަ އެއް ކުލަބު ކަމުގައިވާ ރިވާ ޕްލޭޓުގެ ކޯޗުގެ މަގާމުގައެވެ. އަދި އެޓީމާއެކު އޭނާ ވަނީ އާޖެންޓީނާގެ ލީގު ޗެމްޕިއަންކަން 2021 ވަނަ އަހަރު ހޯދުމުގެ އިތުރުން 2015 އަދި 2018 ވަނަ އަހަރު ދެކޮނު އެމެރިކާގެ އެންމެ ޝަރަފްވެރި ކުލަބު ފުޓްބޯޅަ މުބާރާތް ކަމަށްވާ ކޮޕާ ލިބަޓަޑޯރެސްގެ ޗެންޕިއަން ހޯދާފައެވެ.
އަލް އިއްތިހާދުގެ ކޯޗުކަމުގެ މަގާމު ހުސްވީ ކުރިން އެ މަގާމުގައި ހުރި ޕޯޗުގަލްގެ ނޫނޯ އެސްޕިރިޓޯ ސަންޓޯ މަގާމުން ވަކި ކުރުމާއެކު އެވެ. އޭގެ ފަހުން އަލް އިއްތިހާދުން ގެންނަން ބޭނުންވި ކޯޗުންގެ ލިސްޓުގައި އޮތީ ރެއާލް މެޑްރިޑުގެ ކުރީގެ ކޯޗު ޒިދާން، ރޯމާގެ މިހާރުގެ ކޯޗު މޮރީނިއޯ އަދި ސެވިއްޔާގެ ކުރީގެ ކޯޗު ލޮޕެޓެގީ އެވެ. އަދި ލޮޕެޓެގީ އާއެކު އަލް އިއްތިހާދުން މަޝްވަރާ ކުރި ނަމަވެސް، އޭނާ ވަނީ އެކުލަބުގެ ހުށަހެޅުން ގަބޫލް ނުކޮށްފައެވެ.
Advertisement
This content is created and paid for by advertisers and does not involve Voice Journalists
