އިޒްރާއިލުން ފަލަސްޠީނުގެ ހުޅަނގު އައްސޭރީގައި ހިންގަމުންދާ ޖަރީމާތަކުގައި ހުޅަނގު އައްސޭރިން ދެމީހަކު ޝަހީދުކޮށް ލައިފިއެވެ.

އަލްޖަޒީރާގައި ފަލަސްޠީނުގެ ވަފާ މީޑިއާއަށް ހަވާލާދީ ބުނެފައިވަނީ އިޒްރާއިލުން ހުޅަނގު އައްސޭރީގައި، ޢުމުރުން 46 އަހަރުގެ ނުކުޅެދުންތެރިކަން ހުންނަ މީހަކު ޝަހީދު ކޮށްލައިފައިވާކަމަށެވެ.
އިއްސާމް އަލްފައެދް ނަމަކަށް ކިޔާ އެމީހާ ޝަހީދު ކޮށްލައިފައިވަނީ ޖެނީން ރެފިޔުޖީ ކޭމްޕަށް ވަންނަ ދޮރު ކައިރިން އެމީހާގެ ގަޔަށް ބަޑި ޖަހައިގެނެވެ.

ޝަހީދު ކޮށްލައިފައިވާ ދެވަނަ މީހަކީ 20 އަހަރުގެ ޒުވާނެކެވެ. އޭނާ ޝަހީދު ކޮށްލައިފައިވަނީ ބައިތުއްލަހްމުގައި ހުންނަ ދެއިޝެޙް ރެފިޔުޖީ ކޭމްޕްގައެވެ. އެޒުވާނާވެސް ޝަހީދު ކޮށްލައިފައިވަނީ ބަޑިޖަހައިގެނެވެ.

ޣައްޒާގައި އޮކްޓޫބަރު  7ގައި އިޒްރައިލުން ދޭން ފެށި ހަމަލާތަކާއި އެކު ހުޅަނގުއައްސޭރީގައި އިޒްރާއިލުން ހިންގާ ޖަރިމާތައް ވަނީ ބޮޑު ތަނުން އިތުރުކޮށްފައެވެ.

އެގޮތުން 7 އޮކްޓޫބަރުން ފެށިގެން މިހާތަނަށް ހުޅަނގު އައްސޭރިން 200 މީހަކު ވަނީ ޝަހީދު ކޮށްލައިފައެވެ. އޭގެ ތެރޭގައި 48 ކުޑަކުއްޖަކުވެސް ހިމެނެއެވެ.

މީގެ އިތުރުން އެތައް ބަޔަކު ހައްޔަރުކޮށް ގެން ގެންގޮސްފައިވާއިރު، ހައްޔަރު ކުރާ މީހުންނަށް އިޒްރާއިލް ސިފައިން ދަނީ އަނިޔާ ކުރަމުން ކަމަށްވެސް ބޭރުގެ މީޑިއާތަކުން ވަނީ ބުނެފައެވެ.

ހުޅަނގު އައްސޭރި އަށް އަރައި އިޒްރާއިލުން ދަނީ ޢުމްރާނީ ގޮތުންވެސް އެތަނަށް ބޮޑެތި ގެެއްލުން ތަކެއް ދެމުންނެވެ. ރޭވެސް ބަރުހަތިޔާރާއި އެކު ޖެނީން އަށް އަރައި ޖެނީންގެ މަގުތަކަށް ވަނީ ގެއްލުންދީފައެވެ.